Sumqayıt Dövlət Universitetində yeni kadr təyinatları olub

Sumqayıt Dövlət Universitetində yeni kadr təyinatları olub

Sumqayıt Dövlət Universitetində (SDU) yeni kadr təyinatları həyata keçirilib.

“Azərbaycan müəllimi” xəbər verir ki, SDU-nun rektoru v.i.e., professor Əminağa Sadıqovun müvafiq əmrlərinə əsasən, bir sıra struktur bölmələrə yeni rəhbərlər təyin olunub.

Tədris Metodiki Mərkəzin direktoru vəzifəsinə fəlsəfə doktoru Elnarə Məmmədova təyin edilib. O, Azərbaycan Dövlət İqtisad Universitetində bakalavr və magistratura təhsilini başa vurub, 2022-ci ildə iqtisad elmləri üzrə fəlsəfə doktoru elmi dərəcəsini alıb. 2005-ci ildən SDU-da fəaliyyət göstərən Elnarə Məmmədova müxtəlif kafedralarda pedaqoji işlə yanaşı, elmi fəaliyyətini də uğurla davam etdirib. Onun 59 elmi əsəri, 5 fənn proqramı mövcuddur, məqalələri beynəlxalq reytinqli jurnallarda dərc olunub. Elmi-pedaqoji fəaliyyəti yüksək qiymətləndirildiyi üçün Elm və Təhsil Nazirliyi və Sumqayıt Şəhər İcra Hakimiyyətinin Fəxri Fərmanı ilə təltif olunub.

Beynəlxalq əməkdaşlıq və strateji layihələr şöbəsinin müdiri vəzifəsinə isə Aysel Eminova təyin olunub. Azərbaycan Dillər Universitetinin Avropaşünaslıq və Beynəlxalq Münasibətlər fakültəsini fərqlənmə diplomu ilə bitirən Aysel Eminova 2013-cü ildə Azərbaycan Dövlət İqtisad Universitetində MBA təhsilini ingilis dilində tamamlayıb. O həm ölkədə, həm də ABŞ, Türkiyə, İsveç, Çin, Rusiya və Səudiyyə Ərəbistanı kimi ölkələrdə keçirilən müxtəlif beynəlxalq tədbirlərdə iştirak edib, bir sıra nüfuzlu layihələrin icrasında təcrübə qazanıb. Hazırda doktorantura təhsili alır və “Rəqabət şəraitində müəssisənin dayanıqlılığının qiymətləndirilməsi” mövzusunda dissertasiya üzərində çalışır. Onun elmi məqalələri və tezisləri həm yerli, həm də beynəlxalq nəşrlərdə işıq üzü görüb.

Digər kadr təyinatına əsasən, Anar Dünyamalıyev Karyera və Məzunlarla İş Mərkəzinin direktoru vəzifəsinə gətirilib. SDU-nun məzunu olan Anar Dünyamalıyev 2007-ci ildən universitetdə müxtəlif vəzifələrdə çalışıb: Elektroenergetika kafedrasında laborant, İnformasiya Texnologiyalar Mərkəzində şöbə müdiri, İctimaiyyətlə əlaqələr şöbəsində və Mükəmməllik Mərkəzində baş mütəxəssis kimi fəaliyyət göstərib.

O həmçinin Dövlət İmtahan Mərkəzinin SDU-da fəaliyyət göstərən məsləhət mərkəzində işləmişdir. Yerli və beynəlxalq təlimlərdə iştirak edən Anar Dünyamalıyev müxtəlif sahələrdə bilik və bacarıqlarını artıraraq, bir neçə elmi məqalə və tezisin müəllifi olub.