Rima Quliyeva: İnnovativ texnologiyalar təhsildə inqilabi dönüş yaradır

Rima Quliyeva: İnnovativ texnologiyalar təhsildə inqilabi dönüş yaradır

“Təhsil sahəsindəki yeniliklər yalnız bilik ötürmə funksiyası ilə məhdudlaşmır. Onlar həm də əməkdaşlığı gücləndirir, yaradıcı yanaşmanı inkişaf etdirir və real dünya problemlərinə həll yolları təqdim edir”. 

“Azərbaycan müəllimi” xəbər verir ki, bu fikirləri Elm və Təhsil Nazirliyinin dəstəyi, Elm və Ali Təhsil üzrə Dövlət Agentliyi və “Times Higher Education” (THE) beynəlxalq reytinq agentliyinin birgə təşkilatçılığı ilə Bakıda keçirilən “THE Avrasiya Universitetləri Sammiti”ndə panel müzakirələr zamanı Bakı Ali Neft Məktəbinin kimya mühəndisliyi bölməsinin rəhbəri Rima Quliyeva səsləndirib.

O qeyd edib ki, bu istiqamətdə virtual reallıq və simulyasiya təhsili alətləri, rəqəmsal əməkdaşlıq platformaları, süni intellekt və məlumat analitikası, oyunlaşdırma və interaktiv alətlər mühüm rol oynayır.

Onun sözlərinə görə, bu texnologiyalar biliklərin ötürülməsini keçərək əlaqələr qurur və davamlı öyrənmə prosesini bacarıq və real problem həll etmə yönümlü edir. Xüsusilə virtual laboratoriyalar tələbələrə hava dövranı nümunələrinin okean axınları ilə qarşılıqlı təsirini və ya torpaq istifadəsinin sahil ekosistemlərinə təsirini vizuallaşdırmağa imkan yaradır. Statik diaqramları oxumaq əvəzinə, tələbələr eksperiment apararaq dəyişənləri tənzimləyir və nəticələri dərhal müşahidə edirlər:

“Bu cür innovativ texnologiyalar təhsildə yeni sərhədlər açaraq həm bilik, həm də əməkdaşlıq sahəsində inqilabi dönüş yaradır”.