MDU-da kapital bazarı ilə bağlı təqdimat keçirilib

MDU-da kapital bazarı ilə bağlı təqdimat keçirilib

Sentyabrın 24-də Mingəçevir Dövlət Universitetində (MDU) Elm və innovasiyalar şöbəsinin təşkilatçılığı ilə “Azərbaycanda kapital bazarı: reallıqlar və perspektivlər” mövzusunda təqdimat təşkil olunub.

“Azərbaycan müəllimi” xəbər verir ki, MDU-nun tələbə və magistrantların iştirak etdiyi tədbirin açılışında Elm və innovasiyalar şöbəsinin müdiri dos. Vüqar Mustafayev iştirakçıları rektor Anar Eminovun adından salamlayıb. O, tədbirin əhəmiyyətini vurğulayaraq qeyd edib, təsadüfi deyil ki, Biznes mühiti və beynəlxalq reytinqlər üzrə Komissiyanın sədri, Azərbaycan Respublikası Baş nazirinin birinci müavini Yaqub Eyyubov tərəfindən 6 mart 2025-ci il tarixində təsdiq edilmiş “Korporativ idarəetmə, investisiyalar və korporativ sosial məsuliyyət” işçi qrupunun 2025-ci il üzrə Fəaliyyət Planında 4.2.1 – “Kapital bazarında məlumatlılıq və maarifləndirmə səviyyəsinin artırılması məqsədilə ali məktəb tələbələri üçün təlim və təqdimatların təşkil” yarımbəndi nəzərdə tutulub və bu cür tədbirlər gənc nəsilin maliyyə bazarlarını daha yaxşı anlamağa və onlardan faydalanmağa imkan verir.  

Sonra Elm və innovasiyalar şöbəsinin baş mütəxəssisi Günel Kərimli mövzu üzrə təqdimat edib. O, kapital bazarının mahiyyəti və əsasları, səhmlər və istiqrazlar, investisiya strategiyaları və növləri, risklərin idarə edilməsi və diversifikasiya, kapital bazarının iqtisadiyyatda rolu, Azərbaycan kapital bazarının inkişafı, mövcud imkanlar, xarici investisiyalar və qlobal bazarlar, ölkəmizin kapital bazarına xarici investisiyaların cəlb olunması, tənzimləmə və şəffaflıq və digər məsələlər barəsində tədbir iştirakçılarına ətraflı məlumat verib.

Tədbirin sonunda iştirakçılar arasında fikir mübadiləsi aparılıb, mövzu ilə bağlı suallar cavablandırılıb.