Cəlal Qasımov: “INMerge 2025” innovasiya gələcəyinə güclü təkan verəcək

Cəlal Qasımov: “INMerge 2025” innovasiya gələcəyinə güclü təkan verəcək

“”INMerge 2025” Mərkəzi Avrasiyanın innovasiya gələcəyinə güclü təkan verəcək”.

“Azərbaycan müəllimi” xəbər verir ki, bu sözləri bu gün Bakıda “PAŞA Holding”in təşkilatçılığı ilə keçirilən beynəlxalq “INMerge” İnnovasiya Sammiti 2025-də “PAŞA Holding”in CEO-su Cəlal Qasımov deyib.

O qeyd edib ki, Mərkəzi Avrasiya üçün nəzərdə tutulan böyük innovasiya planı çərçivəsində Azərbaycan, Gürcüstan, Türkiyə, Qazaxıstan, Özbəkistan və digər ölkələrin innovatorları, investorları, korporasiyaları, startapları və ekosistem qurucuları bir araya gətirilib.

“Dünən baş tutan ilk “Emerging Learning Forum” kapital və tərəfdaşlıqların Mərkəzi Avrasiyada inkişafı necə sürətləndirə biləcəyini göstərdi və bugünkü müzakirələr üçün möhkəm zəmin yaratdı”, – deyə Cəlal Qasımov bildirib.

“Bu gün isə region liderlərinin və tərəfdaşlarının ideyaları, innovasiya təşəbbüsləri diqqət mərkəzindədir. Onların hər biri bir-birini gücləndirərək regionun gələcəyinin hərəkətverici qüvvəsinə çevrilir. Bu il təqdim olunan “Emerging Leaders” bölməsi miqyasına və hədəflərinə görə daha iddialıdır. Artıq 5 mindən çox iştirakçı bir araya gəlib və finteks və məsuliyyətli bankçılıqdan data və süni intellektə, sənaye, maliyyə, telekommunikasiya, marketinq və investisiyaya qədər 8 əsas istiqamət üzrə 150-dən çox spiker çıxış edəcək”, – “PAŞA Holding”in CEO-su vurğulayıb.