ADNSU tələbələri Beynəlxalq Astronavtika Konqresində ölkəmizi uğurla təmsil ediblər

Azərbaycan Dövlət Neft və Sənaye Universitetinin (ADNSU) 15 tələbəsi (12 bakalavr, 2 magistr və 1 doktorant) bu il Milli Elmi Komandanın tərkibində Avstraliyanın Sidney şəhərində keçirilən 76-cı Beynəlxalq Astronavtika Konqresində (IAC 2025) öz elmi işlərini təqdim edərək uğurla çıxış ediblər.

“Azərbaycan müəllimi” xəbər verir ki, tələbələr konqresdə elmi məqalələrini və apardıqları tədqiqatları kosmik texnologiyalar, kosmik mühəndislik və qabaqcıl innovativ həllər sahəsində təqdim edərək beynəlxalq ekspertlər tərəfindən yüksək qiymətləndiriliblər. 

Bununla yanaşı, ölkə üzrə yalnız ADNSU-dan olan iki tələbə – Xədicə Hüseynli və İlkin Abdullayev 1028 iştirakçı arasından seçilərək “IAC 2025 Interactive Presentations Competition”un 87 nəfərlik qısa siyahısına daxil olublar. 

Qeyd edək ki, ADNSU tələbələrinin bu nailiyyəti universitetin güclü elmi potensialını, peşəkarlığını və beynəlxalq arenadakı nüfuzunu bir daha nümayiş etdirir. Bu uğur gənc alimlərin dünya səviyyəsində təcrübə qazanmasına geniş imkanlar yaradır və gələcəkdə daha çox innovativ və strateji layihələrin həyata keçirilməsi üçün ilham mənbəyi olur.