NDU-da dərs deyən əcnəbi alimlərin sayı rekord həddə çatıb

2025-2026-ci tədris ilində Naxçıvan Dövlət Universitetində (NDU) 50 nəfər əcnəbi alim çalışacaq. Bu tədris ilində NDU-nun tarixində əcnəbi alimlərin tədrisə cəlb edilmə sayına görə ən yüksək göstərici qeydə alınıb.

NDU-nun Media və ictimaiyyətlə əlaqələr şöbəsindən “Azərbaycan müəllimi”nə verilən məlumata görə, bu tədris ilində 31 xarici professor ali təhsil ocağının 7 fakültəsinə dəvət olunub. Beləliklə, ötən ildən də dəvət edilmiş əcnəbi alimlərlə birgə bu il NDU-da 50 nəfər əcnəbi müəllim çalışacaq. Türkiyə, İordaniya, Yaponiya, Macarıstan və digər ölkələrin nüfuzlu universitetlərdən olan alimlər xüsusilə tibb, əczaçılıq, mühəndislik, iqtisadiyyat, beynəlxalq münasibətlər, hüquq, xarici dillər və digər sahələr üzrə dərs deyəcəklər. Əksəriyyəti Türkiyənin qabaqcıl ali təhsil müəssisələri - İstanbul Universiteti, Orta Şərq Texniki Universiteti (ODTÜ), Karadeniz Texnik Universiteti (KTÜ), Ege Universiteti, İstanbul Universiteti-Cərrahpaşadan olan qonaq professorlar dərslərdə mühazirələr oxuyacaq, tədqiqat aparacaqlar. Artıq yeni dəvət edilmiş əcnəbi alimlər dərslərinə başlayıblar. 

Qeyd edək ki, ali təhsil ocağında artıq oktyabr ayından peşəkar inkişaf təlimlərinə də başlanılıb və bu çərçivədə əcnəbi professorlar bütün fakültələrin müəllimləri üçün də təlimlər keçirlər. Bu təlimlər növbəti ilin aprel ayına qədər davam edəcək. Xatırladaq ki, cari ilin aprel ayında Azərbaycan ali təhsil məkanında ilk dəfə olaraq məhz NDU-da genişmiqyaslı “Beynəlxalq təlim aylığı” proqramı həyata keçirilib. Proqram çərçivəsində 6 ölkədən 21 təlimçi universitetdə müxtəlif sahələri əhatə edən təlimlər aparıb. Həmin təlimlər Azərbaycan, türk və ingilis dillərində olmaqla ABŞ, Yaponiya, İngiltərə, Türkiyə, Niderland və Özbəkistandan olan tanınmış ekspertlərin iştirakı ilə baş tutub.