AzMİU-da italyan dili üzrə PLIDA sertifikasiya imtahanlarının rəsmi başlanğıcı elan olunub

AzMİU-da italyan dili üzrə PLIDA sertifikasiya imtahanlarının rəsmi başlanğıcı elan olunub

Azərbaycan Memarlıq və İnşaat Universitetində (AzMİU) italyan dili üzrə beynəlxalq PLIDA sertifikasiya imtahanlarının rəsmi başlanmasına həsr olunmuş tədbir keçirilib. 

Universitetdən “Azərbaycan müəllimi”nə bildirilib ki, tədbir Xarici əlaqələr şöbəsinin təşəbbüsü və təşkilatçılığı ilə, CIAO şirkətinin və İtaliya Səfirliyinin dəstəyi ilə İtalyan dili və mədəniyyəti üzrə Dünya Həftəsi çərçivəsində baş tutub.

Tədbirdə İtaliyanın Dante Alighieri Cəmiyyətinin nümayəndəsi Alessandro Salacone iştirak edib. O, tədbirə qədər AzMİU-nun beynəlxalq əlaqələr üzrə prorektoru professor Nərgiz Abdullayeva ilə görüşərək universitetdə italyan dilinin tədrisinin inkişaf istiqamətləri, mədəni və akademik əməkdaşlıq perspektivləri barədə fikir mübadiləsi aparıb.

Rəsmi açılış mərasimində çıxış edən Alessandro Salacone PLIDA sertifikasiyasının əhəmiyyətindən danışaraq imtahanların keçirilmə qaydaları, qiymətləndirmə meyarları və beynəlxalq tanınma prinsipləri barədə ətraflı məlumat verib. O qeyd edib ki, PLIDA sertifikatı tələbələrə italyan dilində biliklərini beynəlxalq səviyyədə təsdiqləmək, həmçinin İtaliyada təhsil almaq və karyera qurmaq üçün əlavə üstünlüklər əldə etmək imkanı yaradır.

Tədbir iştirakçıları sertifikasiya prosesi ilə bağlı suallarını qonağa ünvanlayıb, İtaliya ilə mədəni və akademik əlaqələrin genişləndirilməsi istiqamətində maraqlı müzakirələr aparıblar.

AzMİU-da PLIDA imtahanlarının başlanması italyan dilinin tədrisinin beynəlxalq standartlara uyğunlaşdırılması və tələbələrin qlobal təhsil imkanlarına çıxışının genişləndirilməsi baxımından mühüm addım kimi qiymətləndirilir.