ADNSU ilə Özbəkistan universiteti arasında əməkdaşlıq perspektivləri müzakirə olunub

Özbəkistan Biznes və Elm Universitetinin (UBS) nümayəndə heyəti - Elmi işlər və innovasiyalar üzrə prorektor Dr. Dilşod Xolmatov, Təhsilin keyfiyyətinə nəzarət şöbəsinin müdiri Dr. Tulkinjon Sattarov, Beynəlxalq əməkdaşlıq şöbəsinin müdiri Jasur İsroilov Azərbaycan Dövlət Neft və Sənaye Universitetində (ADNSU) olublar.  

"Azərbaycan müəllimi" xəbər verir ki, oktyabrın 30-dan noyabrın 6-dək ADNSU-da elmi-tədqiqat və təcrübə səfərində olan nümayəndə heyəti beynəlxalq əməkdaşlıq çərçivəsində innovasiya, sənaye və təhsili birləşdirən yeni proqramların imkanlarını müzakirə ediblər.

Səfər çərçivəsində qonaqlar ADNSU-nun Tədris işləri üzrə prorektoru Rza Məmmədovla görüşüblər. Görüşdə təhsil əməkdaşlığının gücləndirilməsi, birgə layihələrin icrası, elmi-tədqiqat sahəsində təcrübə mübadiləsi və sənaye yönümlü proqramların tətbiqi kimi məsələlər ətrafında fikir mübadiləsi aparılıb. Qonaqlar sonda xatirə hədiyyəsi təqdim ediblər. 

Qonaqlar səfər müddətində həmçinin, ADNSU-nun tədris imkanları, beynəlxalq əlaqələri və sənayeyə inteqrasiya olunan təhsil modeli ilə yaxından tanış olublar.  Kimya texnologiay fakültəsi (KTF) ilə də görüş keçirilib və görüş gələcək birgə təşəbbüslər üçün zəmin yaradıb.

Qeyd edək ki, səfərin məqsədi iki ali təhsil müəssisəsi arasında əməkdaşlıq perspektivlərini müzakirə etmək, birgə təhsil proqramları, elmi-tədqiqatlar, tələbə və müəllim mübadiləsi sahəsində imkanları araşdırmaq olub.

Səfər çərçivəsində iki universitet arasında Anlaşma Memorandumunun imzalanması istiqamətində razılıq əldə olunub.