Elm və təhsilin inkişafı məktəbdən başlayır – Yevlax məktəbindən reportaj

Elm və təhsil bir millətin gələcək taleyini müəyyənləşdirən iki sütundur. Bu sütunların möhkəm dayanması isə məktəbdən, müəllimdən və onun yetişdirdiyi şagirdlərdən başlayır. Yevlax şəhər Nizami adına 7 nömrəli tam orta ümumtəhsil məktəbi də bu baxımdan Mərkəzi Aran bölgəsində nümunə göstəriləcək təhsil ocaqlarındandır.

1986-cı ildə inşa olunan məktəb bu gün 1176 şagird yerlik binada fəaliyyət göstərir. Hazırda burada 988 şagird təhsil alır, 102 nəfər idarəedici və pedaqoji heyət, 25 nəfər texniki işçi çalışır. Məktəbin 38 sinif komplekti və 3 məktəbəhazırlıq qrupu var.

“Azərbaycan müəllimi” olaraq məktəbdə olduq və təhsil müəssisəsinin rəhbəri  Ülviyyə Ağayeva ilə söhbətləşdik.O bildirdi ki, təhsil mühitinin keyfiyyət göstəricisi yalnız imtahan nəticələri deyil, eyni zamanda məktəbdə formalaşan öyrənmə mədəniyyətidir: “Bizim məqsədimiz hər bir şagirdin təkcə bilikli deyil, həm də düşünən, sual verən, yaradıcı fərd kimi yetişməsidir. 2021-ci ildən məktəbdə “Rəqəmsal bacarıqlar”, STEAM və “İcma əsaslı məktəbəhazırlıq” layihələrini uğurla davam etdiririk. Bu layihələrin hər biri uşaqlarda müasir bacarıqları formalaşdırmaqla bərabər, valideynlərin məktəb həyatına inteqrasiyasını da gücləndirir”.

Peşəkar müəllimlər, innovativ dərs yanaşmaları

Məktəbdə sertifikasiya nəticəsi 50 baldan yuxarı olan bir çox müəllim çalışır. Onlardan bəziləri ilə də həmsöhbət olduq. İbtidai sinif müəllimi Fərqanə Əkbərova (57 bal) bizi sinfində gülərüzlə qarşıladı. Onun dərsində uşaqlar fiqurları oyun şəklində öyrənir, “Rəqəmlər ölkəsinə səyahət” adlı rollu tapşırıqlarda iştirak edirdilər. Fərqanə müəllim deyir ki, ibtidai sinifdə uşağın öyrənməyə həvəsi doğru istiqamətlə formalaşmalıdır: “İbtidai siniflər uşağın gələcək həyatına açılan ilk pəncərədir. Mən çalışıram ki, hər dərsimdə oyun, müzakirə və müşahidə elementləri olsun. Bu, uşağın həm bilik, həm də davranış mədəniyyətini formalaşdırır”.

Elm və təhsil naziri Emin Əmrullayev tərəfindən cari tədris ilində “Azərbaycan Respublikasının qabaqcıl təhsil işçisi”  döş nişanı ilə təltif olunan biologiya müəllimi Gülxanım Musayeva ilə dərsdən sonra söhbətimizdə məktəbdə yaradılan “Yaşıl sinif” təşəbbüsündən bəhs etdi: “Biz məktəbin həyətində mini laboratoriya yaratmışıq. Şagirdlər torpaq və bitkilərlə təcrübə aparır, nəticələri müşahidə jurnallarında qeyd edirlər. Biologiyanı yalnız kitabla deyil, həyatdan öyrənmələrini istəyirəm”.

İngilis dili müəllimi Reyhan Səlimova (56 bal) isə dərslərini interaktiv və praktik əsasda qurur. Reyhan müəllim qeyd edir ki, “dili öyrənmək yalnız qayda əzbərləmək deyil. Biz filmlər izləyirik, mahnılar dinləyirik, dialoqlar qururuq. Şagirdlər özlərini ifadə etməyi öyrəndikcə daha inamlı olurlar”.

Azərbaycan dili və ədəbiyyat fənnini tədris edən Məlahət Məmmədova (55 bal) dərs prosesində məntiqi tapşırıqlara və qrup müzakirələrinə geniş yer verir: “Azərbaycan dili və ədəbiyyatının mahiyyəti düşünmək, analiz etmək və mənanı dərk etməkdir. Hər dərsimizdə şagirdlərlə mətnlər üzərində çalışır, real həyatdan nümunələrə əsaslanırıq. Onlar təkcə sualın cavabını deyil, sözün, cümlənin və mətnin həyatda necə tətbiq olunduğunu da öyrənirlər”.

Fənn müsabiqələrində uğurlar – məktəbin imzası

Yevlax şəhər Nizami adına 7 nömrəli tam orta məktəbin şagirdləri bu il Respublika fənn müsabiqəsinin (RFO) final mərhələsində yüksək nəticələr qazanıblar.

2024-2025-ci tədris ilində məktəbin 7-ci sinif şagirdi Nərgiz Musalı Respublika Fənn Müsabiqəsində biologiya fənni üzrə bürünc medala layiq görülüb. Onun müəllimi Gülxanım Musayeva olub. 6-cı sinif şagirdi Feyruz Məmmədli isə müsabiqədə təbiət fənləri üzrə bürünc medal qazanıb. Ona bu uğurda Ülviyyə Məmmədova dəstək olub.

Respublika Fənn Olimpiadasında isə 8-ci sinif şagirdi Qərənfil Cəfərli biologiya fənni üzrə gümüş medal qazanıb.

Həmsöhbət olduğumuz Qərənfil öz uğurunun sirrini müəlliminə olan sevgidə görür: “Biologiyanı sevməyimdə müəllimim Gülxanım Musayevanın rolu böyükdür. O, bizə təbiəti yalnız öyrətmir, onu hiss etməyi də öyrədir. Hər uğurumda onun əməyi var”.

Feyruz Məmmədli isə müsabiqəyə hazırlaşarkən məktəbin ona yaratdığı şəraiti belə dəyərləndirir: “Məktəbimizdə elmi mühit çox fəaldır. Müəllimlər daim yanımızdadır, motivasiyamızı qorumağa kömək edirlər. Bu inam bizi qalib edir”.

Ali məktəblərə qəbul – uğurlu nəticələr

Bu il məktəbin məzunları da uğurlu nəticələrlə yadda qalıblar. Onlardan Ağalar Şahverdili 575 balla DİN Polis Akademiyası (hüquqşünaslıq), Rəsul Dadaşov 519 balla DİN Polis Akademiyası, Nigar Səmədzadə 551 balla Xəzər Universiteti (Azərbaycan dili və ədəbiyyat müəllimliyi) ixtisasları üzrə təhsillərini davam etdirmək hüququ qazanıblar. Gültəkin Dəmirova Bakı Slavyan Universitetinə (519 bal), Zeynəb Vəliyeva Bakı Dövlət Universitetinə (567 bal) daxil olublar.  

Məzunlardan Nigar Səmədzadə ilə də həmsöhbət olduq. O, müəllimlərinin fədakarlığını minnətdarlıqla xatırladı: “Bu məktəb mənim ikinci evimdir. Müəllimlərimiz hər zaman yanımızda idilər. Hər balın, hər nəticənin arxasında onların zəhməti var. Mən indi müəllim olmaq üçün ali məktəbdə oxuyuram və gələcəkdə elə bu məktəbə qayıdıb uşaqlara dərs demək istəyirəm”.

Layihələrlə zəngin, gələcəyə baxan məktəb

Direktor Ülviyyə Ağayeva ilə söhbətimizin sonunda o, məktəbdə həyata keçirilən layihələrdən bəhs edərək qeyd etdi ki, “bu təşəbbüslər şagirdlərimizin düşünmə və texnoloji vərdişlərini inkişaf etdirir, onların gələcəkdə innovativ sahələrdə uğur qazanmasına zəmin yaradır. Biz çalışırıq ki, hər bir müəllim və şagird bu inkişafın bir parçası olsun”.

Yevlax şəhər Nizami adına 7 nömrəli tam orta ümumtəhsil məktəbi bu gün təhsildə keyfiyyətin, innovasiyanın və fədakarlığın sintezi kimi görünür. Burada müəllim yalnız dərs demir, həm də ruh verir. Şagird yalnız oxumur, həm də öyrənməyi sevir.

Uğurlu idarəçilik, müəllimlərin peşəkarlığı və şagirdlərin əzmi məktəbi Yevlax təhsil mühitində nümunə səviyyəsinə yüksəldib. Bu məktəbdə təhsilin işığı yalnız sinif otaqlarını deyil, uşaqların gələcəyini də nurlandırır.

“Azərbaycan müəllimi” olaraq biz də bu məktəbdə bilik və zəhmətin harmoniyasını, elmə inamın gücünü hiss etdik.