Təhsil krediti ilə universitet xəyalını gerçəkləşdirdi

Aytac Ağalarova Bakıdakı Vüqar Əvəzov adına 300 nömrəli tam orta məktəbdə ümumi orta təhsilini tamamladıqdan sonra Azərbaycan Memarlıq və İnşaat Universiteti nəzdində İnşaat Kollecinə qəbul olub. “İnformasiya texnologiyaları sistemləri” ixtisası üzrə 2020-ci ildə aldığı təhsil sənədi ona eyni ixtisas üzrə subbakalavr kimi Odlar Yurdu Universitetinə müsabiqədənkənar qəbul imkanı verib. O da bunu fürsət olaraq dəyərləndirib: “Kollecdə orta müvəffəqiyyət göstəricim 83 bal idi. Bu da yalnız ödənişli əsaslarla təhsilimi davam etdirməyə imkan verirdi. Universitet oxumaq xəyalım idi. Xəyalımı ancaq bu yolla gerçəkləşdirə bilərdim. Ailəm imkansızlığımıza baxmayaraq, bu arzumu gerçəkləşdirməyimə dəstək verdi və mən eyni ixtisas üzrə təhsilimi ödənişli əsaslarla davam etdirdim”.

Tyutorlardan eşitdiyi xəbər ona dəstək olub

İlk yarım ilin ödənişini ödəyib, ikinci yarımil üçün banka müraciət etməli olacaqdı ki, universitetdə tyutorlardan eşitdiyi xəbər ona dəstək olub: “Heç tərəddüd etmədim, dərhal Təhsil Tələbə Krediti Fonduna müraciət etdim. Çünki təhsil krediti olmasaydı, bankdan kredit götürməli olacaqdım”.

Beləliklə, 2022-ci ilin yanvar ayında Təhsil Tələbə Krediti Fonduna müraciəti müsbət qarşılanıb: “Müraciətimə müsbət cavab verildi. Mənə standart təhsil tələbə krediti təyin edildi və vəsait universitetin hesabına köçürüldü. Dördüncü kursa qədər kreditdən yararlandım və deyə bilərəm ki, mənə çox böyük kömək oldu. Təhsilimi rahat şəkildə davam etdirmək üçün bu sistem, sözün əsl mənasında, mənim üçün bir xilas yolu idi”.

Aytac deyir ki, Təhsil Tələbə Krediti Fondu, sadəcə təhsil haqqını ödəyərək xilas etməyib onu: “Fondun fəaliyyətinin başqa faydaları da var. Məsələn, Fond ödənişsiz kurslar da təşkil edir. Mən təhsil aldığım vaxt İKT üzrə kurs təşkil edildi”.

Universiteti bitirəndə 25 faiz güzəşt

Aytac artıq universitet məzunudur: “2024-cü ildə universiteti 91+ ortalama ilə bitirdim. Ümumi orta müvəffəqiyyət göstəricimə görə Təhsil Tələbə Krediti Fondu 25 faiz güzəşt tətbiq etdi”.

A.Ağalarova geri ödənişə məzun olan kimi başlayıb: “Universiteti bitirdikdən sonra ilk iş yerim elə Odlar Yurdu Universiteti oldu. Bir müddət orada tyutor vəzifəsində çalışdım. Artıq başqa bir özəl müəssisənin “Qeydiyyat” bölməsində çalışıram. Krediti 10 il müddətinə bağladığımız müqavilə ilə geri ödəyirəm. Ödəmə müddəti böyük olduğu üçün çətinlik çəkmədən borcumu ödəyirəm”.

Təhsil krediti stimullaşdırır

O, təhsil kreditini həyatının ən böyük fürsəti hesab edir: “Təhsil tələbə krediti dövlətimizin biz gənclərə yaratdığı çox böyük fürsətdir. Hər gənc bu fürsətdən yararlanmalıdır. Nəinki aşağı faizlə borc götürür, borcun müəyyən faizini, hətta yarısını güzəştlə geri qaytarmaq imkanı da verilir və bu, daha yaxşı oxumaq, daha böyük uğurlar qazanmaq üçün insanı stimullaşdırır”.