ADNSU-da əcnəbi tələbələr üçün startap və innovasiya mövzusunda təqdimat keçirilib

Azərbaycan Dövlət Neft və Sənaye Universitetinin (ADNSU) Startap və TTO şöbə müdiri Əhməd Əhmədzadə əcnəbi tələbələrlə görüş keçirib.

ADNSU-dan "Azərbaycan müəllimi"nə bildirilib ki, o, universitetdə fəaliyyət göstərən startap ekosistemi, inkubasiya proqramları, hakatonlar və tələbələr üçün yaradılan innovativ imkanlar barədə ətraflı məlumat verib.

Görüş zamanı inkubasiya proqramlarının əsas üstünlükləri – mentor dəstəyi, xüsusi təlimlər, prototip hazırlamaq üçün ayrılan maliyyə dəstəyi və proqramı uğurla başa vuran komandalar üçün mükafatlar haqqında ətraflı məlumat tələbələrin diqqətinə çatdırılıb.

Tələbələrə həmçinin yaxın zamanda keçiriləcək süni intellekt hakatonu barədə məlumat verilib. Bildirilib ki, iki gün davam edəcək hakaton çərçivəsində tələbələr innovativ ideyalarını real həllərə çevirərək prototip hazırlaya biləcəklər.

Görüşdə eyni zamanda süni intellektin sənaye, tibb, kənd təsərrüfatı, yaşıl enerji və müdafiə sahələrində geniş tətbiq imkanları barədə nümunələr təqdim olunub. 

Sonda əcnəbi tələbələrin startap və innovasiya fəaliyyətlərində daha fəal iştirakının önəmi qeyd olunub və onlar universitetdə keçiriləcək layihə və proqramlara qoşulmağa dəvət edilib.