AzMİU-da “Uşaq hüquqları aylığı” çərçivəsində tədbir keçirilib

Hər il 20 oktyabr – 20 noyabr tarixləri arasında ölkəmizdə “Uşaq hüquqları aylığı” qeyd olunur. Bu münasibətlə Azərbaycan Memarlıq və İnşaat Universitetində (AzMİU) maarifləndirici tədbir təşkil edilib.

"Azərbaycan müəllimi" xəbər verir ki, tədbiri AzMİU Tələbə Həmkarlar İttifaqı Komitəsinin sədri Şahmar Rəfili açaraq bildirib ki, hər bir şəxs öz hüquqlarını bilməli və onları qorumağı bacarmalıdır. Sədr bu istiqamətdə universitetdə keçirilən maarifləndirici tədbirlərin əhəmiyyətini vurğulayaraq ölkəmizdə uşaq hüquqlarının qorunması sahəsində görülən işlərdən söz açıb. Qeyd edib ki, uşaq hüquqlarının müdafiəsi Azərbaycanın dövlət siyasətinin əsas istiqamətlərindəndir. Uşaqların təhsil, sağlamlıq və sosial rifahının təmin olunması üçün həyata keçirilən tədbirlər sözügedən siyasətin mühüm tərkib hissəsidir.

Daha sonra tədbirin təlimçi qonağı — “Azərbaycan Uşaqlarının İnkişaf Platforması” İctimai Birliyinin sədr müavini Misir Məmmədov çıxış edərək iştirakçılara Birləşmiş Millətlər Təşkilatının “Uşaq hüquqları haqqında” Konvensiyasının mahiyyəti, uşaqların hüquqlarının müdafiəsinə dair qəbul olunmuş milli qanunvericilik aktları və dövlət proqramları haqqında geniş məlumat verib. O, uşaqların hüquq və vəzifələri mövzusuna toxunaraq, onların sağlam, təhlükəsiz mühitdə böyüməsinin vacibliyini xüsusi vurğulayıb. Bildirib ki, bu prosesdə həm cəmiyyətin, həm də ailələrin üzərinə böyük məsuliyyət düşür.

Tədbirin sonunda mövzu ətrafında geniş fikir mübadiləsi aparılıb və iştirakçıların çoxsaylı sualları cavablandırılıb.