Siyavuş Novruzov: Neft gəlirləri hesabına tikilən məktəblər regionların inkişafına mühüm töhfə verir

“Neft müqavilərinin uğurlu icrası ölkəyə böyük maliyyə vəsaiti qazandırıb. Neftdən gələn gəlirlər Azərbaycanın infrastrukturunun yenilənməsinə, regionların inkişafına, sosial layihələrin həyata keçirilməsinə, ünvanlı sosial yardım və özünüməşğulluq proqramlarının maliyyələşdirilməsinə yönəldilir”.

“Azərbaycan müəllimi” xəbər verir ki, bu sözləri Milli Məclisin bugünkü plenar iclasında Regional məsələlər komitəsinin sədri Siyavuş Novruzov “Azərbaycan Respublikasının 2026-cı il dövlət büdcəsi haqqında” qanun layihəsinin müzakirəsi zamanı deyib.

Komitə sədri bildirib ki, məhz bu gəlirlər hesabına son illər ölkədə çoxsaylı xəstəxanalar, məktəblər inşa olunub, yollar çəkilib və bu infrastrukturdan birbaşa vətəndaşlar faydalanır. Siyavuş Novruzov neft gəlirləri hesabına tikilən məktəblərin regionların inkişafına mühüm töhfə verdiyini xüsusi vurğulayıb.

O əlavə edib ki, dövlət büdcəsinin prioritetləri ölkənin dayanıqlı inkişafını, sosial rifahın gücləndirilməsini və təhlükəsizlik mühitinin qorunmasını təmin etməyə xidmət edir.

Siyavuş Novruzov qeyd edib ki, Azərbaycanda ictimai-siyasi sabitlik beynəlxalq tədbirlərin sayına da əhəmiyyətli təsir göstərir. O bildirib ki, 2023–2024-cü illərdə ölkədə 190-dan çox beynəlxalq tədbir keçirilib və bu say ildən-ilə artmaqdadır: “Bir gündə belə demək olar ki, ölkəmizdə bir neçə beynəlxalq tədbir keçirilir. Bu, Azərbaycanın sabitliyinin, xalq birliyinin və ölkədə formalaşmış etibarlı təhlükəsizlik sisteminin nəticəsidir”.