NDU-da gender bərabərliyi ilə bağlı yeni kitab təqdim olunub

Noyabrın 21-i Naxçıvan Dövlət Universitetinin Elmi Kitabxanasında universitetin Azərbaycan tarixi kafedrasının professoru Sevinc Abbasovanın müəllifi olduğu, Azərbaycan və ingilis dillərində işıq üzü görmüş “İlham Əliyev: qadınlara istiqamətli qlobal təşəbbüslər və gender bərabərliyinin inkişafı (2003-2023)” adlı kitabın təqdimatı keçirilib.

"Azərbaycan müəllimi" xəbər verir ki, Naxçıvan Dövlət Universitetinin rektoru Elbrus İsayev Ulu Öndər Heydər Əliyev tərəfindən əsası qoyulan dövlət qadın siyasətinin bu gün Prezident cənab İlham Əliyev tərəfindən uğurla davam etdirildiyini vurğulayıb. Rektor “Konstitusiya və Suverenlik İli” çərçivəsində keçirilən kitab təqdimatının heç də təsadüfi olmadığını söyləyib. Diqqətə çatdırılıb ki, ölkəmizdə qadın hüquqlarının qorunması, sosial ədalət və insan ləyaqətinin təmin edilməsi Azərbaycan Konstitusiyasının və dövlət suverenliyinin təməl dəyərlərindəndir. Ali təhsil ocağının rektoru təqdimatı keçirilən kitabın müəllifinin nümunəvi addım ataraq tarixə ekskursiya etdiyini və mənbələrə, faktlara söykənərək maraqlı bir iş ərsəyə gətirdiyini vurğulayıb.

NDU-nun Elm və innovasiya məsələləri üzrə prorektoru Elsəvər Əsədov nəzərə çatdırıb ki, kitabda Azərbaycanda qadınların təhsil hüquqları, gender bərabərliyini təmin etmək və sosial inkişafı dəstəkləmək baxımından mühüm əhəmiyyətə malik materiallar yer alıb. Qeyd olunub ki, kitab NDU-nun Elmi Şurasının qərarı ilə nəşr olunub.

Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin Ailə, qadın problemləri və gender məsələləri şöbəsinin müdiri Könül Babayeva kitabın bir növ Azərbaycan gender siyasətinin 20 illik salnaməsi olduğunu bildirib. Könül Babayeva qeyd edib ki, bu cür nəşrlərin hazırlanması gələcək tədqiqatçılar üçün dəyərli mənbə olmaqla yanaşı, gənc nəsli də maarifləndirir və onları cəmiyyətə aktiv sosial mövqe tutmağa həvəsləndirir.

Azərbaycan tarixi kafedrasının müdiri Xəzər Hüseynov, Bakı Dövlət Universitetinin müəllimi Vəsilə Möhsümova, Naxçıvan Hərbi Kollecinin rəisi, polkovnik Yaşar Hüseynov, Tarix-filologiya fakültəsinin dekan müavini Qadir Əkbərov, “Azərbaycan ədəbiyyatı” kafedrasının müdiri Nurlana Əliyeva, “Jurnalistika və xarici ölkələr ədəbiyyatı” kafedrasının müdiri Şəhla Şirəliyeva çıxış edərək kitabın geniş müzakirələrə və faydalı fikir mübadiləsinə səbəb olacağını bildiriblər.

Sonda müəllif – professor Sevinc Abbasova kitabın işıq üzü görməsində zəhməti olan hər kəsə və universitet rəhbərliyinə elm yolunda yaradılan imkanlara görə minnətdarlığını bildirib.

Qeyd edək ki, kitabda 2003-2023-cü illər ərzində Ümummilli Lider Heydər Əliyev, Prezident cənab İlham Əliyev, Birinci vitse-prezident Mehriban xanım Əliyeva və Heydər Əliyev Fondu tərəfindən müstəqil Azərbaycan dövlətinin təməllərinin möhkəmləndirilməsində mühüm əhəmiyyət kəsb edən gendər siyasətinin aparıcı istiqamət xətti ön plana çəkilib.