ADNSU-da Elmi Şuranın iclasında görüləcək işlər və hədəflər müzakirə olunub

Dekabrın 1-də Azərbaycan Dövlət Neft və Sənaye Universitetində (ADNSU) Elmi Şuranın növbəti iclası keçirilib.

"Azərbaycan müəllimi" xəbər verir ki, iclasın əvvəlində rektor, dosent Rüfət Əzizov ADNSU himninin sözlərini yazdığı və musiqisini bəstələdiyi üçün Gülşən Rafiq qızı Əliyevanı təbrik edib, onun bu vətənpərvər yaradıcılığını yüksək qiymətləndirərək sertifikatla təltif edib.

Sonra iclasın gündəliyi şura üzvlərinə təqdim olunub və təsdiq edilib.

Rektor Rüfət Əzizovun sədrliyi ilə keçirilən iclasda universitetdə təhsil və tədrisin keyfiyyətinin yüksəldilməsi, elmi nəticələrin artırılması və qarşıda duran vəzifələr müzakirə olunub.

Elmi Şuranın iclasında çıxış edən rektor akademik və pedaqoji heyətin üzərinə düşən vəzifələrdən danışaraq onların ayrı-ayrılıqda əldə etdikləri uğurların universitetin ümumi inkişafına töhfə verdiyini vurğulayıb. O qeyd edib ki, komanda olaraq qarşıya qoyulan hədəflərə çatmaq və mühüm nailiyyətlər əldə etmək üçün hər kəs öz vəzifəsini yüksək səviyyədə icra etməlidir. Rektorun təqdimatı əsasında Elmi Şura ADNSU-nun professor-müəllim heyətinin əməkhaqlarının artırılması barədə qərar qəbul edib.

ADNSU-nun Elm departamentinin direktoru, k.ü.f.d. Əli Əlizadə buraxılış işləri və magistr dissertasiyası mövzularının təsdiqi, həmçinin dissertasiya şuralarının fəaliyyəti barədə təqdimatla çıxış edib.

Gündəliyə uyğun olaraq Sosial məsələlər üzrə rektorun müşaviri Nəsibə Əmirbəyova tələbələrin hüquq və vəzifələri haqqında təlimatın təsdiq olunmasına dair təqdimatını şura üzvlərinə təqdim edib.

Gündəlikdəki bütün məsələlər şura üzvləri tərəfindən müzakirə edilib və yekdil qərarlarla təsdiqlənib.

İclasın sonunda rektor Rüfət Əzizov müzakirə olunan məsələlərlə bağlı təklif və iradlarını bildirib, aidiyyəti struktur bölmələrə müvafiq tapşırıqlar verib.