GDU-da “Sağlam həyat tərzinin təbliği” mövzusunda tədbir keçirilib

GDU-da “Sağlam həyat tərzinin təbliği” mövzusunda tədbir keçirilib

Gəncə Şəhər Birləşmiş Xəstəxanasının təşkilatçılığı, Gəncə Şəhər İcra Hakimiyyətinin dəstəyi ilə Gəncə Dövlət Universitetində (GDU) tələbələrin iştirakı ilə “Sağlam həyat tərzinin təbliği” mövzusunda tədbir təşkil edilib.

Universitetdən “Azərbaycan müəllimi”nə bildirilib ki, tədbirdə çıxış edən GDU-nun Humanitar məsələlər üzrə prorektoru Gülsüm Fətəliyeva narkomaniyanın cəmiyyət üçün yaratdığı ciddi təhlükələrdən və onun insan sağlamlığına vurduğu ağır zərərlərdən danışıb. Prorektor gənclərin sağlam həyat tərzini seçməsinin vacibliyini və milli-mənəvi dəyərlərə bağlılığın bu istiqamətdə mühüm rol oynadığını qeyd edib.

Gəncə Şəhər Birləşmiş Xəstəxanasının direktor müavini Yalçın Babayev çıxışında narkotik vasitələrdən istifadənin insan həyatı üçün təhlükəsindən söz açıb. Gənclərin bu istiqamətdə mütəmadi maarifləndirilməsinin vacibliyini bildirib.

Gəncə Şəhər İcra Hakimiyyətinin nümayəndəsi Xalidə Mete məişət zorakılığı mövzusuna toxunub. Bu cür halların qarşısının alınması üçün maarifləndirmə işinin gücləndirilməsinin dövlətimizin siyasətində bu gün də ən mühüm prioritetlərdən biri olduğunu qeyd edib.

Həkim-terapevt Aysel Əliyeva isə çıxış edərək, müasir dövrdə gənclərin zərərli vərdişlərdən qorunmasının olduqca vacibliyindən danışıb. Tədbir iştirakçılarına sağlam həyat tərzinin əsas komponentləri haqqında məlumat verən A.Əliyeva yeniyetmə və gəncləri sağlam həyat tərzinin normalarına riayət etməyə və zərərli vərdişlərdən uzaq durmağa çağırıb.

Gəncə şəhər Narkoloji Dispanserinin əməkdaşı Nurlana Rəhimova da narkotik vasitələrə yaranan asılılıqdan və ölkəmizdə narkomaniyaya qarşı aparılan mübarizədən danışaraq, şəxsiyyətin formalaşması üçün cəmiyyətin nə qədər önəmli faktor olduğunu və bu sahədə ictimai maarifləndirmə işlərinin əhatəsinin genişləndirilməsinin vacibliyini diqqətə çatdırıb.

Gəncə Şəhər Birləşmiş Xəstəxanasının hüquqşünası Hadı Hüseynov ölkəmizdə məişət zorakılığı ilə bağlı mövcud vəziyyət, məişət zorakılığına qarşı mübarizə sahəsində atılan addımlar barədə ətraflı məlumatı tədbir iştirakçılarının diqqətinə çatdırıb.

Sonda tələbələrin sualları cavablandırılıb, mövzu ətrafında müzakirələr aparılıb.