Gender bərabərliyi cəmiyyətin innovativ və dayanıqlı inkişafına mühüm töhfə verir

Əmək və Sosial Münasibətlər Akademiyasında  (AƏSMA) “Gender bərabərliyində gənclərin iştirakı” mövzusunda tədbir keçirilib.

"Azərbaycan müəllimi"xəbər verir ki, tədbirdə AƏSMA-nın rektor vəzifəsini icra edən Fərid Babayev, Ailə, Qadın və Uşaq Problemləri üzrə Dövlət Komitəsinin əməkdaşı Sevinc Məmmədova, Gəncə Regional Qadın Mərkəzinin sədri Məleykə Əlizadə və AHİK-in Gənclər, sosial layihələr və gender məsələləri ilə iş şöbəsinin müdir müavini Gülnarə Hüseynova çıxış edərək gender bərabərliyinin əsasları barədə danışıblar. Çıxışlarda həmçinin  gənclərin dayanıqlı inkişaf məqsədləri ilə tanışlığının önəmindən söz açılıb.

Qeyd olunub ki, gender bərabərliyi yalnız sosial ədalətin təmin olunmasına deyil, həm də cəmiyyətin innovativ və dayanıqlı inkişafına mühüm töhfə verir. Bildirilib ki, gənclərin bu prosesdə fəal iştirakı gender stereotiplərinin aradan qaldırılmasına və inklüziv qərarvermə mühitinin formalaşmasına şərait yaradır.

Tədbirdə həmçinin mövzu ilə bağlı müzakirələr aparılıb, tələbələrin sualları cavablandırılıb.