“QS Reimagine Education 2025” konfransının açılışı olub

Dekabrın 2-də Birləşmiş Krallığın London şəhərində "Quacquarelli Symonds" (QS) qlobal reytinq agentliyinin təşkilatçılığı ilə “QS Reimagine Education 2025” konfransının rəsmi açılış mərasimi baş tutub.

"Azərbaycan müəllimi" xəbər verir ki, Azərbaycan tədbirdə Elm və Ali Təhsil üzrə Dövlət Agentliyi, Bakı Dövlət Universiteti, Azərbaycan Dövlət Neft və Sənaye Universiteti və Azərbaycan Texniki Universitetinin nümayəndələrindən ibarət heyətlə təmsil olunur.

Konfrans çərçivəsində Elm və Ali Təhsil üzrə Dövlət Agentliyinin direktoru Ülkər Səttarova QS agentliyinin baş icraçı direktoru Cessika Törner və baş vitse-prezident Ben Sauter ilə görüş keçirib. Görüş zamanı Azərbaycan universitetlərinin qlobal reytinqlərdə mövcud göstəriciləri müzakirə olunub, həmçinin gələcək inkişaf istiqamətləri üzrə fikir mübadiləsi aparılıb.

Qeyd edək ki, üç gün davam edəcək konfrans təhsildə innovasiyalar, süni intellektin tətbiqi, inklüziv yanaşmalar və məzun məşğulluğu kimi aktual mövzuları əhatə edir. Tədbir çərçivəsində həmçinin müxtəlif kateqoriyalar üzrə seçilmiş layihələrin qaliblərinin elan olunması nəzərdə tutulur.