IBO-da iştirak etmək istəyirəm – Astara məktəblisinin elmi hədəfi

23 noyabr – 2 dekabr tarixlərində Rusiyada keçirilən Yeniyetmələrin Beynəlxalq Elm Olimpiadasında (IJSO 2025) Azərbaycan məktəbliləri yüksək nəticə əldə ediblər. Rusiya, Çin, Hindistan, Macarıstan, Serbiya, Tayland və digər ölkələri təmsil edən güclü komandaların iştirak etdiyi nüfuzlu elm yarışında 6 nəfərdən ibarət milli komandamız ümumilikdə 4 gümüş və 2 bürünc medal qazanaraq iştirakçı ölkələr sırasında 5-ci yerə layiq görülüb.

Bu olimpiadada fərdi şəkildə gümüş medal qazanan şagirdlərdən biri də Astara rayonunun Pensər kəndində yerləşən Z.Ə.Əhmədzadə adına 2 nömrəli məktəb-liseyin X sinif şagirdi Rəsul Şahverdiyevdir. O, son illərdə elmi hazırlığı və fənn olimpiadalarındakı uğurları ilə seçilən şagirdlərdəndir. Biologiyaya xüsusi marağı olan Rəsul gələcək hədəfini də dəqiq müəyyənləşdirib: o, Beynəlxalq Biologiya Olimpiadasında – IBO-da Azərbaycanı təmsil etməyi qarşısına məqsəd qoyub.

“Azərbaycan müəllimi” olaraq bu iddialı şagirdlə daha yaxından tanış olub uğurlarından bəhs etmək istədik.
İlk dəfə V sinifdə oxuyanda Lütfi Zadə adına riyaziyyat-məntiq olimpiadasında gümüş medal qazanan Rəsul VII sinifdə Respublika fənn müsabiqəsində biologiya fənni üzrə qızıl medal əldə edib. VIII sinifdə Respublika fənn olimpiadalarının finalçısı olsa da, medal qazana bilməyib. Bu il (2025–2026-cı tədris ili) isə yenidən RFO-da iştirak edərək biologiya üzrə bürünc medal qazanıb.

Respublika fənn olimpiadalarının qalibi kimi Beynəlxalq Olimpiadalara Hazırlıq Mərkəzinin dərslərinə qatılan Rəsulun fəaliyyəti ardıcıl və məqsədyönlüdür. Onun sözlərinə görə, bu mühit ona yeni biliklər qazanmaq və hədəflərinə daha inamla yaxınlaşmaq imkanı verir:

“Hazırda həm də Beynəlxalq Olimpiadalara Hazırlıq Mərkəzinin şagirdiyəm. Hazırlıq mərkəzində dərslər mənim üçün böyük təcrübədir. Gələcəkdə IBO-da iştirak etmək istəyirəm və burada öyrəndiklərim bu yolda mənə çox kömək edir”.

Rəsulun Yeniyetmələrin Beynəlxalq Elm Olimpiadasına – IJSO-ya qatılma qərarı isə həm marağının, həm də ətrafında olan elmi mühitin təsiri ilə formalaşıb. O, olimpiadaçı dostlarının təşviqi ilə sentyabr ayında keçirilən seçim mərhələsinə qatılıb və Azərbaycanı beynəlxalq arenada təmsil edəcək altı şagirddən biri olub. Rəsul bu barədə belə deyir:

“Dostlarımın dəstəyi məni seçim imtahanına qatılmağa həvəsləndirdi. Nəticədə Azərbaycanı təmsil edəcək altı şagirddən biri oldum və bu mənim üçün böyük məsuliyyət idi”.

Rəsul bu yarışın onun üçün ən böyük qazancının təcrübə olduğunu vurğulayır:

“IJSO mənə IBO üçün böyük təcrübə verdi. Bu yarış gələcək addımlarıma daha ciddi yanaşmağı öyrətdi”.
O, qazandığı uğurlarda müəllimlərinin və dostlarının rolunu xüsusi qeyd edir:

“Bu nəticəyə görə üzərimdə əziyyəti olan müəllimlərimə və hər zaman yanımda olan olimpiadaçı dostlarıma minnətdaram”.

Elm yolunda ardıcıl addımlar atan Rəsulun inkişaf dinamikası, məqsədyönlü fəaliyyəti və beynəlxalq arenadakı uğurları gələcəkdə onun ölkənin ən perspektivli gənc tədqiqatçılarından biri olacağına əminlik yaradır.