Ülviyyə Axundova: Könüllülər azərbaycançılığın təbliği arenalarında çıxış etsinlər

“Əgər biz sağlam bir cəmiyyət istəyirik, gənclərimizin gələcəkdə savadlı, məsuliyyətli insanlara çevrilməsini arzulayırıqsa, könüllülük fəaliyyətinin önəmi həmin istiqamətdə daha da yüksəlir”.

“Azərbaycan müəllimi” xəbər verir ki, bu fikirləri Gənclər və İdman Nazirliyinin Gənclərlə iş şöbəsinin müdir müavini Ülviyyə Axundova “Azərbaycan Könüllülük Həftəsi 2025”in başlaması ilə əlaqədar keçirilən mətbuat konfransında söyləyib.

O bildirib ki, Gənclər və İdman Nazirliyi hər il istər ölkə daxilində, istərsə də xaricində könüllülük fəaliyyətlərini və gənclər üçün müxtəlif layihələri təşkil edir:

“Biz istəyirik ki, gənclərimiz bütün platformalarda könüllülük fəaliyyəti göstərsinlər, azərbaycançılığın təbliği üzrə aparılan arenalarda çıxış etsinlər, orada fəal olsunlar. Ümid edirik ki, könüllülərimizin sayı hər il daha da artacaq, onların cəmiyyətə və Azərbaycana verdiyi fayda çoxalacaq”, – deyə o bildirib.