Mərkəzi Elmi Kitabxananın direktoru texnika elmləri doktoru Hüseyn Hüseynovun 5 dekabr – Beynəlxalq Könüllülər Günü münasibətilə “MEK könüllüləri”nə təbriki

Mərkəzi Elmi Kitabxananın direktoru texnika elmləri doktoru Hüseyn Hüseynovun 5 dekabr – Beynəlxalq Könüllülər Günü münasibətilə “MEK könüllüləri”nə təbriki

Hörmətli “MEK könüllüləri”,

Könüllülük bu gün Azərbaycanda geniş yayılmış və gənclərimizin həyat tərzinə çevrilmiş ən dəyərli sosial hərəkatlardan biridir. Dövlət səviyyəsində göstərilən dəstək nəticəsində ölkəmizdə könüllülük sistemi formalaşmış, gənclərin sosial, humanitar və mədəni layihələrdə fəal iştirakı üçün geniş imkanlar yaranmışdır.

Azərbaycan Milli Elmlər Akademiyasının Mərkəzi Elmi Kitabxanası da bu ümummilli hərəkatın fəal iştirakçılarından biridir. AMEA prezidentinin dəstəyi ilə 24 iyun 2024-cü il tarixli əmrə əsasən ölkənin kitabxana məkanında ilk dəfə olaraq Mərkəzi Elmi Kitabxanada “MEK könüllüləri” proqramı istifadəyə verilib. Qısa müddətdə bu proqram kitabxana işi sahəsində real təcrübə qazandıran, gəncləri peşəkar kitabxanaçı kimi formalaşdıran mühüm platformaya çevrilib.

Fəaliyyətə başladığınız ilk gündən etibarən nümayiş etdirdiyiniz məsuliyyət, intizam, təşəbbüskarlıq və nümunəvi davranış MEK kollektivinin hər bir üzvü tərəfindən yüksək qiymətləndirilir. Kitabxanamızın 100 illik yubileyinə təsadüf edən bu dövrdə göstərdiyiniz xidmət yalnız iş yükünün bölüşdürülməsi ilə məhdudlaşmır - siz MEK-in modern, açıq və gənclər-orientasiyalı imicinin formalaşmasına mühüm töhfə verirsiniz. Sizin fəal iştirakınız sayəsində kitabxanada maraqlı, sosial yönümlü və genişmiqyaslı layihələr, eləcə də müxtəlif tədbirlər uğurla həyata keçirilib.

Artıq üçüncü çağırışı həyata keçirilən proqram çərçivəsində könüllülərimiz kitabxana işinin müxtəlif istiqamətlərinə cəlb olunaraq praktiki bilik və bacarıqlar əldə edir, kitabxananın fəaliyyət səmərəliliyinin artırılmasına yaxından dəstək verirlər. Bu, həm kitabxanaya və oxuculara göstərilən diqqətin nümunəsidir, həm də gənclərin bu sahəyə marağının artmasına böyük töhfədir. MEK-in gənclərlə əməkdaşlığa verdiyi xüsusi önəm sayəsində rəqəmsallaşma prosesindən tutmuş sosial layihələrə qədər bir çox işlər onların fəal iştirakı ilə daha dinamik şəkildə həyata keçirilir.

Beynəlxalq Könüllülər Günü münasibətilə “MEK könüllüləri”ni səmimi-qəlbdən təbrik edir, fəaliyyətinizdə yeni uğurlar arzulayıram.

Sizin enerjiniz, ideyalarınız və əməyiniz kitabxanamızın inkişafına əvəzsiz töhfədir.

Uğurlarınız bol olsun!