Azərbaycan Fəlsəfə Olimpiadasına qeydiyyat davam edir

Azərbaycanda VIII–XI sinif şagirdləri arasında keçirilən Azərbaycan Fəlsəfə Olimpiadasına (AzFO) qeydiyyat davam edir.

"Azərbaycan müəllimi" xəbər verir ki, olimpiada Beynəlxalq Fəlsəfə Olimpiadasının (IPO) standartlarına uyğun şəkildə təşkil olunur. Layihənin Azərbaycanda rəsmi təşkilatçısı "Global Olympiad Center"dir.

AzFO-nun final mərhələsində daha yüksək nəticə göstərən iki şagird, UNESCO və Fəlsəfə Cəmiyyətləri Beynəlxalq Federasiyası (FISP) tərəfindən dəstəklənən və 50-dən çox ölkənin iştirak etdiyi IPO 2026-da Azərbaycanı təmsil etmək imkanı əldə edəcək. Beynəlxalq mərhələnin bu il Polşanın Varşava şəhərində, Polşa Təhsil Nazirliyinin ev sahibliyi ilə keçirilməsi planlaşdırılır.

Mütəxəssislər qeyd edirlər ki, AzFO şagirdlər arasında fəlsəfi mövzularda düşünməyə marağın artmasına, analitik mühakimə, arqumentasiya və tənqidi düşünmə bacarıqlarının inkişafına şərait yaradır. Olimpiadada əsasən şagirdlərin fikirlərini ardıcıl və əsaslandırılmış formada ifadə etmək bacarığı qiymətləndirilir, xüsusi fəlsəfi terminologiya və ya dərin nəzəri bilik əsas şərt kimi tələb olunmur.

Təşkilatçılar bildirirlər ki, “fəlsəfə” anlayışı valideyn və şagirdlərdə çətin və yalnız ixtisaslaşmış bilik tələb edən sahə təsəvvürü yaratmamalıdır. AzFO xüsusi fəlsəfi hazırlıq tələb edən akademik imtahan deyil; burada şagirdlərdən əsasən məntiqi düşünmək, mövzunu təhlil etmək və fikirlərini əsaslandırmaq gözlənilir.

AzFO üçün əvvəlcədən xüsusi hazırlıq şərt deyil. Seçim mərhələsində şagirdlərə dörd mövzu təqdim olunur, onlardan birini seçərək 2 saat müddətində esse yazırlar. Qiymətləndirmədə şagirdin düşüncə ardıcıllığı, məntiqi yanaşması və ideyanı necə əsaslandırması nəzərə alınır.

Olimpiada iki mərhələdən ibarətdir:

● Seçim mərhələsi – esse Azərbaycan dilində yazılır.
● Final mərhələsi – esse ingilis dilində yazılır və IPO meyarlarına uyğun qiymətləndirilir.

Təhsil sahəsində mütəxəssislər hesab edirlər ki, bu olimpiadada iştirak şagirdlərdə analitik təfəkkür, arqumentasiya, problem həlli və yaradıcı düşünmə kimi bacarıqların formalaşmasına kömək edir. Bu bacarıqlar bir sıra beynəlxalq ali təhsil müəssisələrinin qəbul proseslərində də nəzərə alınan kompetensiyalar sırasına daxildir.

Qeyd edək ki, olimpiadada iştirak tam ödənişsizdir. Qeydiyyat hazırda açıqdır və VIII–XI sinif şagirdləri üçün əlçatandır.

Müraciət etmək üçün şagirdlər goc.edu.az saytına daxil ola bilərlər.