AzMİU-nun 2 tələbəsi “Women in Architecture” müsabiqəsinin qalibi olub

Heydər Əliyev Mərkəzində keçirilən “Women in Architecture” müsabiqəsinin mükafatlandırma mərasimi keçirilib.

Azərbaycan Memarlıq və İnşaat Universitetindən (AzMİU) "Azərbaycan müəllimi"nə bildirilib ki, universitetin iki tələbəsi müsabiqənin qalibi olub.

Nüfuzlu memarlıq şirkətləri — “Chapman Taylor”, “Zaha Hadid Architects” və “Scott Brownrigg” tərəfindən aparılan qiymətləndirmə nəticəsində universitetin tələbələri Ləman Mirzəyeva və Simuzər Abbasovanın layihələri qalib seçilib. Sözügedən layihələr Qrafik və media dizaynı kafedrasının baş müəllimi Firuzə Bədəlovanın mentorluğu ilə hazırlanıb.

Tədbirdə Dizayn fakültəsinin dekanı Fərid Kərimov, Mühit dizaynı kafedrasının müdiri Yeganə Hacıyeva, Qrafik və media dizaynı kafedrasının müdiri Təranə Bəkirova da iştirak ediblər.

Qeyd edək ki, müsabiqə AzMİU-nun İtaliya–Azərbaycan Dizayn Mərkəzi və Britaniyanın Azərbaycandakı səfirliyinin birgə təşkilatçılığı ilə baş tutub.