Uşaqlıqda gördüyü problemə tələbəliyində çarə tapdı – AzMİU tələbəsinin uğur hekayəsi

Azərbaycan Memarlıq və İnşaat Universitetində (AzMİU) “Marketinq” ixtisası üzrə II kurs tələbəsi Davud Abdullayev İqtisadi İslahatların Təhlili və Kommunikasiya Mərkəzinin “Enterprise Azerbaijan” portalı tərəfindən təşkil olunan “Startup School 3” layihəsi çərçivəsində həyata keçirilən “Yaşıl və rəqəmsal İpək yolu” beynəlxalq akselerasiya proqramında ən fəal iştirakçılardan biri kimi xüsusi uğur qazanıb. Onun “ScienceDelta” startapı təqdim olunan layihələr arasında 7 ən yaxşı startapdan biri olub.

Elm adamları ilə əlaqə qura bilmirdik

Davud deyir ki, innovasiya, yaradıcılıq, elm və xüsusilə də kosmos sahəsinə uşaqlıqdan böyük maraq göstərib. Elə o vaxtdan müxtəlif ideyalar üzərində işləyib, yeni sahələri araşdırıb və problemlərə fərqli rakursdan yanaşmağı vərdişə çevirib. Qalibi olduğu startapın mövzusu olan problemi də elə uşaqlıqda görüb. Belə ki, məktəbli fizika-astronomiya istiqamətində layihə hazırlamaq istəsə də, həmin sahədə mentor tapmaqda böyük çətinliklərlə üzləşdiyini deyir:

“Balakən şəhəri Vətən Müharibəsi Qəhrəmanı Amin Novruzov adına Humanitar və Texniki Təmayüllü liseyin şagirdi olmuşam. “Sabahın alimləri” müsabiqəsinə qatıldım. XI sinifdə oxuyurdum. Məktəb komandası olaraq qoşulmuşduq. Mentorumuz da elə öz müəllimimiz idi. Hazırlıq mərhələsində elm adamları ilə əlaqə qura bilmədik. Bu sahədə koordinasiyanın kifayət qədər zəif olduğunu müşahidə edirdim. Ölkədəki elm həvəskarlarını bir araya gətirəcək, onların ünsiyyət qurmalarına və elmi müzakirələr aparmalarına imkan yaradacaq vahid platformanın çatışmadığını görür, bu boşluğun nə qədər ciddi olduğunu dərk edirdim”.

Budur, uşaqlıqda gördüyü problemə tələbəliyində çarə tapıb. Sözügedən çatışmazlığı aradan qaldırmaq məqsədilə “ScienceDelta”nı yaratmağa qərar verib.

Sosiallaşma və akademik əlaqədə məhdudiyyət olduğunu müəyyənləşdirdim

Davud “ScienceDelta” startap ideyasının yaranmasını məhz astronomiya sahəsindəki şəxsi təcrübələri ilə əlaqələndirir:

““ResearchGate”, “Academia.edu” və “Google Scholar” kimi platformaları analiz edərək, əsasən, məzmun paylaşımı funksiyasına yönəldim, sosiallaşma və akademik əlaqə imkanlarının məhdud olduğunu müəyyənləşdirdim. Bu səbəbdən “ScienceDelta”nı daha funksional, interaktiv və elmi müzakirələrə açıq sosial platforma kimi formalaşdırdım”. 

Layihə üzərində işləyərkən xeyli çətinliklər aşmalı olub:

“Kodlaşdırma, dizayn, bazar araşdırması və prototip hazırlığı kimi işlərdə çətinliklərim yarandı. Kodlaşdırma biliklərim olsa da, mürəkkəb platformanı qısa vaxtda təkbaşına hazırlamaq çox çətin oldu. Bu mərhələdə müxtəlif süni intellekt alətlərindən, xüsusilə “Lovable AI”dan istifadə edərək minimum işlək prototipi hazırlaya bildim. Paralel şəkildə rəqib analizi, bazar tədqiqatları, gəlir modeli və istifadəçi təcrübəsi üzrə də geniş araşdırmalar apardım”.

Avqust ayında qoşulduğu müsabiqə sayəsində yüzlərlə yanaşmanı sınaqdan keçirib:

“Bir neçə ay ərzində prototipi tamamladım və 140-dan çox layihə arasından seçilərək final mərhələsinə yüksəldim”.

“DemoDay” günündə ən cəlbedici stend onunku idi

Proqramın yekunu olan “DemoDay” günündə stendi lap kənarda yerləşsə də, həm iştirakçılar, həm rəqib komandalar, həm münsiflər məhz onun layihəsinə maraq göstəriblər.

Davudun yeddilik qaliblər siyahısına daxil olması onun üçün mühüm dönüş nöqtəsi olub. O, ingilis dilində üç dəqiqəlik “Pitch Deck” təqdimatını uğurla yerinə yetirib və yüksək qiymət alıb: “Proqram mənə startapın planlaşdırılması, investorlarla ünsiyyət, təqdimat bacarıqları, ideyanın doğrulanması və komanda quruculuğu kimi çoxsaylı bilik və təcrübələr qazandırdı. Layihə ətrafında həm yerli, həm də xarici investorlarla əlaqələrim yarandı, hətta ABŞ-də potensial investisiya imkanları ilə bağlı ilkin müzakirələr apardıq”.

Layihənin daha professional versiyasını hazırlayır

Hazırda layihənin daha professional versiyasını hazırlamaq, komandasını genişləndirmək və platformanı yeni funksiyalarla zənginləşdirməklə məşğuldur:

“KOBİA-dan startap sertifikatı almağı, eləcə də universitetlər və elm mərkəzləri ilə tərəfdaşlıq etməyi planlaşdırıram. “ScienceDelta”nı gələcəkdə qlobal elm ekosisteminin bir parçası kimi görürəm və onu Azərbaycanın ilk “unicorn” startaplarından birinə çevirməyi hədəfləyirəm.

Bu startapım inamım, dözümüm, araşdırmam sayəsində ərsəyə gəldi. Startapımı kiçik toxumdan cücərən bir fidana bənzədirəm. O, qətiyyətlə çalışsam, yüzillik çinar ağacı ola bilər”.

Ona görə də elm yolunu tutan məktəblilərə məsləhət görür ki, öyrənmək istədikləri sahənin çətinliyindən vahimələnməsinlər: “İstənilən sahə üzrə öyrənmək istəyə bilərlər, bu, biologiya da ola bilər, astronomiya da. Əsas məqsədləri hər zaman ən yeni məlumatlara sahib olmaq olmalıdır. İndiki zəmanəmizdə elm sahəsi çox sürətlə inkişaf edir, bu səbəbdən elmi davamlı təqib etmək və onu öyrənməyə davam etmək lazımdır. Bununla yanaşı, yerli elmi mənbələrə çatmağa da çalışmalıdırlar. Bunun üçün Milli Kitabxananı və ya Elmi Kitabxananı məsləhət görərdim. Nə gecikməkdən, nə də sahənin çətinliyindən narahat olmasınlar. Əsas hədəf elmin özü olmalıdır”.

Uğurunda universitetinin də payı var

Məktəb illərində istiqamətverənə, mentora ehtiyacı olsa da, tələbəlikdə bu dərdi olmayıb. Çünki yanında böyük bir universitet olub:

“AzMİU-da aldığım təhsil də şəxsi inkişafına mühüm təsir göstərdi, xüsusilə kommunikasiya və çevik düşünmə bacarıqlarım burada güclənib. Bilirsiniz ki, universitetimizdə İnnovativ biznes inkubator bölməsi fəaliyyət göstərir. Bu fəaliyyət çərçivəsində seminarlara, master-klaslara və mentorluq sessiyalarna qatıldm və bu fəaliyyət məndə startap düşüncə tərzinin formalaşmasına müsbət təsir göstərdi. Məni “Startup School 3” beynəlxalq proqramına yönləndirən də bölmənin rəhbəri Rasim Abdullayev oldu. Nəinki yönləndirdi, hətta bu prosesdə mənə ciddi dəstək göstərdi. Layihə üzərində tək işlədiyim dönəmdə ən böyük yardımçım universitetimizin İnnovativ Biznes İnkubator şöbəsinin rəhbəri Rasim Abdullayev oldu. Onun təcrübəsi və mentorluğu, xüsusilə startapın yaradılması və idarə edilməsində bilgisi mənim üçün əvəzsiz oldu. Təlimlərdə yumşaq bacarıqlarımı inkişaf etdirdim”.

Startap üzərində tək işləyən Davud komanda quruculuğu üzərində çalışır: “Birlikdə işləyə biləcəyim insanların axtarışındayam”.