ADNSU-da “105 ildən gələn birlik: Məzunlar Assosiasiyasının görüşü” keçirilib

Dekabrın 23-də Azərbaycan Dövlət Neft və Sənaye Universitetində (ADNSU) “105 ildən gələn birlik: Məzunlar Assosiasiyasının görüşü” təşkil olunub.

ADNSU-dan "Azərbaycan müəllimi"nə bildirilib ki, universiteti müxtəlif illərdə bitirmiş məzunlarını bir araya gətirən tədbir iştirakçılar üçün nəzərdə tutulan şəbəkələşmə ilə başlayıb.

Tədbirin rəsmi hissəsində əvvəlcə Azərbaycan Respublikasının Dövlət Himni səsləndirilib, ölkəmizin müstəqilliyi və ərazi bütövlüyü uğrunda canlarından keçmiş şəhidlərin xatirəsi bir dəqiqəlik sükutla yad edilib.

Azərbaycan Dövlət Neft və Sənaye Universitetinin rektoru Rüfət Əzizov tədbirdə açılış nitqi ilə çıxış edərək ADNSU-nun 105 illik zəngin tarixi, elmi potensialı və məzunlarının ölkənin sosial-iqtisadi inkişafında oynadığı mühüm roldan bəhs edib. Rektor universitet–məzun əlaqələrinin gücləndirilməsinin ADNSU üçün prioritet istiqamətlərdən biri olduğunu vurğulayıb və universitet haqqında geniş təqdimatla çıxış edib.

Sonra ADNSU Məzunlar Assosiasiyasının İdarə Heyətinin sədri Nuran Hüseynov çıxış edərək xatirələrini bölüşüb, məzunların universitet həyatında fəal iştirakının əhəmiyyətindən danışıb və görüşdən məmnunluğunu bildirib.

Daha sonra universitetin fəxri məzunlarından - Azərbaycan Respublikasının Diasporla İş üzrə Dövlət Komitəsinin sədri  Fuad Muradov və “Ümid Babək Əməliyyat Şirkəti”nin (UBOC) baş direktoru Elxan Bəşirov ADNSU-da keçirdikləri illəri və peşəkar fəaliyyətlərindən danışıblar. Çıxışçılar illər sonra belə bir görüşdə iştriak etməyin sevincini bölüşüb, tədbirin təşkili üçün ADNSU rəhbərliyinə dərin təşəkkürlərini bildiriblər.

Tədbir çərçivəsində ADNSU tələbələrinin və “Gənclik” rəqs ansamblının ifasında mahnı və rəqs nömrələri səsləndirilib.

Tədbirin sonunda Azərbaycan Dövlət Neft və Sənaye Universitetinin himni səsləndirilib.