NDU-nun 2000-ə yaxın tələbəsi Təhsil Tələbə Krediti Fonduna müraciət edib 

Naxçıvan Dövlət Universitetində Tədris departamentinin Monitorinq və qiymətləndirmə sektorunun təşkilatçılığı ilə “Kredit sistemi ilə tədrisin təşkili, təhsil tələbə krediti və imtahan prosesi” mövzusunda tələbələrlə görüşlər keçirilib.

Universitetdən “Azərbaycan müəllmi”nə verilən məlumata görə, sektor müdiri Elgün Tağıyev tələbələrə kredit sisteminin əsas prinsipləri, fərdi tədris planı, semestrlər və imtahanların təşkili, yay semestri, eləcə də ümumi orta müvəffəqiyyət göstəricisinin (ÜOMG) hesablanma qaydası barədə ətraflı məlumat verib.

Görüşdə Azərbaycan Prezidentinin 17 iyun 2021-ci il tarixli 1367 nömrəli Fərmanına əsasən yaradılan Təhsil Tələbə Krediti Fondu və onun fəaliyyət prinsipləri diqqətə çatdırılıb. Qeyd olunub ki, qüvvədə olan normativ sənədlərə əsasən, bəzi sosial kateqoriyalara aid olan tələbələr üçün ödənişlə bağlı xüsusi güzəştlər tətbiq olunur. Belə ki, valideynlərini itirmiş və ya valideyn himayəsindən məhrum olmuş tələbələr, habelə şəhid ailələrinin üzvləri və I–II qrup əlilliyi olan şəxslər təhsil haqqından azad edilən kateqoriyalara daxildir.

Eyni zamanda bildirilib ki, Təhsil Tələbə Krediti mexanizmi çərçivəsində sosial təhsil tələbə krediti normativ sənədlərlə müəyyən edilmiş sosial həssas qruplara şamil olunur. Standart təhsil tələbə krediti isə sosial kateqoriyaya aid olmayan, lakin müəyyən edilmiş akademik tələblərə cavab verən tələbələr üçün nəzərdə tutulur.

Tədbirdə həmçinin imtahan prosesinin təşkili, qiymətləndirmə meyarları və tələbələrin hüquqları ilə bağlı geniş məlumat təqdim olunub. Görüş interaktiv şəkildə davam edib, tələbələrin sualları cavablandırılıb və motivasiyaedici slayd nümayiş olunub.

Qeyd edək ki, Naxçıvan Dövlət Universitetində Təhsil Tələbə Krediti proqramı 2021–2022-ci tədris ilindən tətbiq edilir. Bu günədək Naxçıvan Dövlət Universitetinin təxminən 2000-ə yaxın tələbəsi proqrama müraciət edib, eyni zamanda TTKF tərəfindən universitetə 1 milyon manatdan çox vəsait köçürülüb.