Səhnəciklər və oyunlarla öyrədilən ingilis dili: Kənd məktəbində fərqli yanaşma


Bəzən uğur böyük şəhərlərdə, geniş imkanlar içində deyil, uzun yolların sonunda, səbir və davamlılıqla yazılır. Ağdaş rayonunun Yuxarı Nemətabad kənd tam orta məktəbində formalaşan bu uğur hekayəsi də məhz belə nümunələrdəndir.

“Azərbaycan müəllimi” olaraq məktəbin müəllim və şagirdləri ilə həmsöhbət olduq.

Mingəçevirdə yaşayan gənc müəllim Nigar Abduləzimova artıq 6 ildir ki, hər gün Ağdaş rayonuna gedərək kənd məktəbində ingilis dili fənnini tədris edir. Uzun yol məsafəsi onun pedaqoji fəaliyyətinə mane olmur. Nigar müəllimlə söhbətləşirik: “Mən müəllimliyi yalnız iş kimi yox, məsuliyyət kimi qəbul edirəm. Yol uzaqdır, amma şagirdlərin dərsdə öyrənməyə marağı bütün yorğunluğu aradan qaldırır. Kənd məktəbində işləmək mənə daha çox məsuliyyət yükləyir”.

O qeyd edir ki, müəllimlik ailə ənənəsidir. Atası uzun illər məktəbdə dərs deyib, qardaşı isə riyaziyyat və informatika müəllimidir: “Müəllim ailəsindənəm. Bu, mənim üçün həm dayaqdır, həm də məsuliyyətdir. Bildiklərimi şagirdlərə düzgün və faydalı şəkildə ötürməyə çalışıram”.

Nigar Abduləzimova dərslərində layihə əsaslı tapşırıqlara, qrup işlərinə, səhnə təqdimatlarına və şifahi ünsiyyət bacarıqlarının inkişafına yönəlmiş fəaliyyətlərə üstünlük verir. Onun sözlərinə görə, məqsəd şagirdlərin ingilis dilini yalnız dərs çərçivəsində deyil, praktik bacarıq kimi mənimsəməsidir.

Bu yanaşma məktəbdə keçirilən mədəniyyətlərarası mövzulu tədbirdə də öz əksini tapıb. Tədbir məktəbin ingilis dili müəllimləri Nigar Abduləzimova və Fəridə Yunusova tərəfindən birgə təşkil olunub və həyata keçirilib.

Fəridə Yunusova artıq 40 ildir ki, Yuxarı Nemətabad kənd məktəbində ingilis dili fənnini tədris edir. O deyir: “Bu məktəbdə illərdir ingilis dili tədris olunur. Zaman dəyişir, metodlar yenilənir. Gənc müəllimlərin bu prosesə qoşulması tədrisə yeni nəfəs gətirir. Nigar müəllimlə ilə birgə işləmək, təcrübə və yeni yanaşmaları birləşdirmək faydalıdır”.

Şagirdlər də müəllimlərin dərs keçmə tərzinin onların dilə marağını artırdığını bildirirlər. 9-cu sinif şagirdi Zərifə Məmmədli deyir: “Əvvəllər ingilis dili çətin görünürdü. İndi isə dərslərdə danışmağa çalışırıq, səhnəciklər hazırlayırıq. Bu, bizə kömək edir”.

Aişə Qafarlı isə əlavə edir: “Dərslər təkcə kitab üzərində olmur. Müxtəlif tapşırıqlar, oyunlar, layihələr olur. Bu da dili daha yaxşı anlamağa kömək edir”.

Tədbir zamanı şagirdlərin hazırladığı səhnə çıxışları təqdim olunub. 9-cu sinif şagirdləri Mədinə Məmişova, Fatimə İsmayılova və Sürəyya Mustafayeva Üzeyir Hacıbəylinin “Arşın mal alan” operettasından səhnələri ingilis dilində nümayiş etdiriblər. Tuncay Məmmədli və Aysel Rəhimova Vəli və Telli obrazlarını canlandırıblar.

Şagird Səidə İsmayılovanın təqdim etdiyi rəqs də proqramda yer alıb. Daha sonra 6-cı sinif şagirdləri ingilis dilində mahnılar ifa edib və “Dənizçi rəqsi”ni nümayiş etdiriblər. Şagirdlər Murad, Nərgiz, Fidan və Orxan söhbət zamanı bildiriblər ki, evdə də ingilis dilində mahnılar dinləyir, videolar izləyir və öyrəndiklərini təkrarlayırlar.

Yuxarı Nemətabad kənd tam orta məktəbin müəllimi və uzun illər direktoru olmuş Şahid Əhmədov isə bu cür fəaliyyətlərin əhəmiyyətindən danışır: “Bu cür tədbirlər şagirdlərin biliklərini praktik şəkildə göstərməsinə imkan yaradır. Müəllimlərin birgə işi və davamlı fəaliyyəti nəticəsində uşaqlar özlərinə daha çox inanırlar”.

Sonda demək olar ki, Yuxarı Nemətabad kənd məktəbində formalaşan bu təcrübə məsuliyyətli müəllim əməyinin, nəsillərarası pedaqoji davamlılığın və kənd məktəbinin potensialının bariz nümunəsidir. Mingəçevirdən Ağdaşa uzanan yol isə bir müəllimin deyil, bütövlükdə təhsilə verilən dəyərin göstəricisidir.