Magistraturaya qəbulda YENİLİK - Esse tələbi qoyuldu

“Bu il magistraturaya qəbul prosesində  yenilik tətbiq olunur”.

Bu barədə “Azərbaycan müəllimi”nə açıqlamasında Dövlət İmtahan Mərkəzinin sektor müdiri Xanlar Xanlarzadə məlumat verib. 
O bildirib ki, Qəbul imtahanı fevralın 15-də keçiriləcək. Belə ki, tədrisi ingilis və alman dillərində olan ixtisaslaşmaları seçmək istəyən bakalavrlar mütləq esse yazmalı və 5 baldan azı 2 bal toplamalıdırlar.

Əvvəlki illərdə esse yazmaq məcburi deyildi. Yeni qaydaya əsasən, bu tələb yalnız ingilis və alman dilli ixtisaslaşmalara şamil olunur. Azərbaycan və rus dillərində olan ixtisasları seçən namizədlər üçün esse tələbi tətbiq edilmir.
Qeyd edək ki, magistratura səviyyəsi üzrə təhsil almaq istəyən bakalavrlar üçün sənəd qəbulu prosesinə dünən start verilib. Namizədlər yanvarın 26-dək Dövlət İmtahan Mərkəzinin rəsmi internet saytı vasitəsilə qeydiyyatdan keçə bilərlər. Bakalavrlar həm fevralın 15-də, həm də yay sessiyasında keçiriləcək magistratura qəbul imtahanlarında iştirak edə bilərlər.