MDU-da region məktəbliləri üçün riyaziyyat olimpiadası keçiriləcək
 

Mingəçevir Dövlət Universiteti (MDU) və “Techera” şirkətinin birgə təşkilatçılığı ilə region məktəbliləri arasında riyaziyyat olimpiadası keçiriləcək.

“Azərbaycan müəllimi” xəbər verir ki, bu barədə Mingəçevir Dövlət Universitetinin rektoru Anar Eminov açıqlama verib.

Rektor bildirib ki, bu elmi-intellektual olimpiadanın əsas məqsədi riyaziyyata marağı olan şagirdlərin bilik və bacarıqlarını üzə çıxarmaq, onların məntiqi təfəkkürünü, analitik düşünmə və problem həll etmə bacarıqlarını inkişaf etdirməkdir.

Onun sözlərinə görə, bu cür tədbirlər regionda sağlam rəqabət mühitinin formalaşmasına, elmi düşüncənin təşviqinə və məktəblilərin elmə, ali təhsilə marağının artırılmasına mühüm töhfə verir.

Riyaziyyat olimpiadasında Mingəçevir, Ağdaş, Göyçay, Kürdəmir, Zərdab, Ucar və Yevlax şəhər və rayonlarının ümumtəhsil müəssisələrində təhsil alan məktəblilər iştirak edəcəklər.

Olimpiadanın yekununda qaliblər və fərqlənən iştirakçılar diplom və sertifikatlarla təltif olunacaqlar.

Anar Eminov vurğulayıb ki, Mingəçevir Dövlət Universiteti olaraq bu cür elmi-intellektual təşəbbüslərin regionda insan kapitalının inkişafına, gənclərin potensialının düzgün istiqamətləndirilməsinə və təhsildə keyfiyyətin yüksəldilməsinə xidmət etdiyinə inanılır.

Qeyd edək ki, olimpiada ilə bağlı əlavə məlumat almaq istəyənlər [email protected] elektron poçt ünvanı vasitəsilə əlaqə saxlaya bilərlər.