Gənclər üçün rəqəmsal mühitdə hüquqi maarifləndirmə təlimi təşkil olunub

Gənclər üçün rəqəmsal mühitdə hüquqi maarifləndirmə təlimi təşkil olunub

Azərbaycan Respublikası Gənclər Fondunun “Konstitusiya və Suverenlik İli” çərçivəsində elan etdiyi fərdi qrant müsabiqəsinin qalibi olmuş “Mediada gənclərin hüquqi mübarizəsi” layihəsi çərçivəsində gənclərin hüquqi biliklərinin artırılması və mediadan düzgün istifadə bacarıqlarının inkişaf etdirilməsi məqsədilə növbəti təlim təşkil olunub.

"Azərbaycan müəllimi" xəbər verir ki, keçirilən təlimdə TOT sertfikatı, karyera məsləhətçisi, Mingəçevir STEAM Mərkəzinin koordinatoru təlimçi Müşfiq Tarıverdiyev gənclərlə birbaşa işləyərək mediada hüquqi maarifləndirmənin əsas prinsiplərini, gənclərin hüquq və vəzifələrini, eləcə də sosial mediada hüquqların qorunması yollarını ətraflı şəkildə izah edib.

Təlim interaktiv metodlar və praktiki nümunələr üzərində qurulub. İştirakçılar qanunvericilik sahəsində əsas bilikləri əldə etmək, öz hüquqlarını daha yaxşı tanımaq və mediada informasiya ilə düzgün və məsuliyyətli şəkildə işləmə bacarıqlarını inkişaf etdirmək imkanı qazanıblar.

Həmçinin təlim gənclərin ictimai fəallığının artırılmasına, şəxsi və ictimai hüquqlarını müdafiə etmə bacarıqlarının gücləndirilməsinə yönəlib. Təlim zamanı aparılan müzakirələr gənclərin cəmiyyətlə ünsiyyət bacarıqlarının inkişafına və onların daha məlumatlı ictimai iştirakçı kimi formalaşmasına töhfə verib.

Təlimçi Müşfiq Tarıverdiyev çıxışı zamanı qeyd edib ki, bu cür maarifləndirici təşəbbüslər gənclərin həm şəxsi, həm də ictimai hüquqlarını qorumaq qabiliyyətini gücləndirir və mediadan məsuliyyətli istifadə vərdişlərinin formalaşmasına xidmət edir.

Qeyd edək ki, layihənin rəhbəri Vaqif Fətullayevdir. Layihə Azərbaycan Respublikası Gənclər Fondunun dəstəyi ilə “Konstitusiya və Suverenlik İli” çərçivəsində icra olunmağa davam edir və gənclərin hüquqi maarifləndirilməsi istiqamətində mühüm töhfələr verir.