RFO-da şagird fəallığı: lider region hansıdır?

Yanvarın 18-də 2025–2026-cı tədris ili üzrə Respublika fənn olimpiadalarının rayon (şəhər) mərhələsi ölkə üzrə uğurla təşkil olunub.

"Azərbaycan müəllimi" xəbər verir ki, olimpiadada VIII–XI siniflər üzrə ümumilikdə 48 minə yaxın şagird iştirak edib. Bilik yarışı Azərbaycan dili və ədəbiyyat, riyaziyyat, fizika, kimya, biologiya, coğrafiya və tarix fənləri üzrə bütün şəhər və rayonları əhatə edib.

Respublika fənn olimpiadaları ümumi təhsil müəssisələrinin 8, 9, 10 və 11-ci sinif şagirdləri arasında xüsusi istedada malik olan məktəbliləri aşkar etmək, onların bilik və bacarıqlarını qiymətləndirmək, fənlərə marağı artırmaq məqsədilə hər tədris ilində bir dəfə keçirilir.

Regionlar üzrə iştirak göstəriciləri olimpiadaların geniş coğrafiyanı əhatə etdiyini və şagirdlərin bilik yarışlarına yüksək maraq göstərdiyini deməyə əsas verir.

Mərkəzi Aran Regional Təhsil İdarəsinin tabeliyində fəaliyyət göstərən 7 mərkəz üzrə ümumilikdə 2 755 şagird müsabiqədə iştirak edib.

Respublika fənn olimpiadaları işğaldan azad olunmuş ərazilərdə də təşkil edilib. Qarabağ Regional Təhsil İdarəsi üzrə 7 mərkəzdə keçirilən olimpiadalara 1 900 nəfərdən çox şagird qatılıb. Qeyd edək ki, bu il ilk dəfə olaraq Ağdam rayonunun Xıdırlı kənd tam orta məktəbinin şagirdləri də olimpiadada iştirak edib ki, bu da işğaldan azad edilmiş ərazilərdə təhsil həyatının bərpasının mühüm göstəricisi kimi qiymətləndirilir.

RFO-nun rayon (şəhər) turunun imtahanları Zəngilan rayonunun Ağalı kənd, Cəbrayıl şəhəri Mehdi Mehdizadə adına və Kəlbəcər şəhəri Bəhmən Cəfərov adına 1 nömrəli tam orta məktəblərində yaradılmış 3 mərkəzdə keçirilib. Xüsusilə qeyd olunmalıdır ki, bu il Kəlbəcər şəhərində Respublika fənn olimpiadaları ilk dəfə təşkil edilib.

Abşeron-Xızı Regional Təhsil İdarəsi üzrə isə 3 670 şagird (informatika fənni istisna olmaqla) olimpiadada iştirak hüququ qazanıb. Onlardan 90 faizdən çoxu rayon (şəhər) mərhələsində faktiki iştirak edib. AXRTİ üzrə olimpiadalar əvvəlcədən müəyyən edilmiş imtahan mərkəzlərində təşkil olunub və VIII–XI sinif şagirdlərini əhatə edib.

Gəncə-Daşkəsən Regional Təhsil İdarəsi üzrə də Respublika fənn olimpiadalarının rayon (şəhər) mərhələsi əvvəlcədən müəyyən edilmiş imtahan mərkəzlərində təşkil olunub. 2476 nəfər şagird 6 mərkəzdə biliyini sınayıb.

Lənkəran-Astara Regional Təhsil İdarəsinin tabeliyində fəaliyyət göstərən ümumi təhsil müəssisələrində isə ümumillikdə 2934 nəfər şagird 7 mərkəzdə imtahan verib.

Ümumilikdə regionlar üzrə mənzərə göstərir ki, Respublika fənn olimpiadaları artıq təkcə bilik yarışması deyil, eyni zamanda ölkənin bütün bölgələrində istedadlı şagirdlərin üzə çıxarılması, onların inkişafına dəstək verilməsi və təhsildə regional bərabərliyin təmin olunması baxımından mühüm platformaya çevrilib. Xüsusilə işğaldan azad edilmiş ərazilərdə olimpiadaların keçirilməsi təhsil həyatının bərpası istiqamətində real göstərici qiymətləndirilir.

Qeyd edək ki, olimpiadanın rayon (şəhər) mərhələsinin nəticələri 3 fevral tarixindən etibarən www.portal.edu.az platformasında və iştirakçıların təhsil aldıqları ümumi təhsil müəssisələri vasitəsilə elan olunacaq.