“Qərbi Azərbaycan tarixi Azərbaycan diyarıdır” mövzusunda açıq dərslər keçirilib

Fevralın 13-də Şirvan şəhəri və Hacıqabul rayonunun ümumtəhsil məktəblərində “Qərbi Azərbaycan tarixi Azərbaycan diyarıdır” mövzusunda açıq dərslər keçirilib.

"Azərbaycan müəllimi" xəbər verir ki, Hacıqabul şəhər 10 nömrəli tam orta ümumtəhsil məktəbində və Şirvan şəhər 10 nömrəli tam orta ümumtəhsil məktəblərində təşkil olunan dərslər filoloq alim, filologiya elmləri doktoru, professor, Azərbaycan Dövlət Pedaqoji Universitetinin Beynəlxalq əlaqələr üzrə prorektoru, Qərbi Azərbaycan İcması İdarə Heyətinin üzvü Mahirə Hüseynova tərəfindən aparılıb.

Tədbirlərdə Elm və Təhsil Nazirliyinin Uşaq və gənclərin inkişafı şöbəsinin Tələbə-gənclərlə işin əlaqələndirilməsi sektorunun müdiri Hilal Salmanov, Daxili nəzarət qrupunun Təhsil sisteminin inkişafı və proqnozlaşdırılması problemləri üzrə elmi-tədqiqat laboratoriyasının aparıcı mütəxəssisi, Azərbaycan Yazıçılar Birliyinin üzvü Rövşən Ağayev, müvafiq icra hakimiyyəti orqanlarının rəhbərliyi, Qərbi Azərbaycan İcmasının yerli nümayəndələri, regional təhsil idarəsinin və yerli təhsil sektorlarının əməkdaşları, Yeni Azərbaycan Partiyasının yerli təşkilat nümayəndələri, Qərbi Azərbaycan İcmasının yerli təşkilat rəhbərləri və üzvləri, məktəblərin tarix və coğrafiya müəllimləri, IX–XI sinif şagirdləri iştirak ediblər.

Professor M.Hüseynova çıxışında Qərbi Azərbaycanın tarixi yaddaşımızı əks etdirən maddi-mədəniyyət abidələri, toponim və hidronimlər barədə ətraflı məlumat verib. O, xalqımızın müxtəlif dövrlərdə tarixi torpaqlarından deportasiyalara məruz qaldığını bildirib, eyni zamanda Qərbi azərbaycanlıların doğma yurdlarına qayıdış ideyasının dövlət siyasətində mühüm yer tutduğunu diqqətə çatdırıb.

Tədbirdə çıxış edən nümayəndələr belə maarifləndirici tədbirlərin məktəblilərin tarixi yaddaşının möhkəmləndirilməsi, milli kimlik şüurunun qorunması və vətənpərvərlik hisslərinin gücləndirilməsi baxımından əhəmiyyətini vurğulayıblar.

Açıq dərslər çərçivəsində mövzu ətrafında geniş müzakirələr aparılıb, şagirdlərin sualları cavablandırılıb. Fəallıq göstərən şagirdlərə professor M.Hüseynovanın müəllifi olduğu kitablar hədiyyə edilib, həmçinin Qərbi Azərbaycana həsr olunmuş əsərlər və yazıçı Rövşən Ağayev tərəfindən kitablar məktəblərin kitabxana fonduna təqdim olunub.

Qeyd edək ki, tədbirlərin keçirilməsində məqsəd şagirdlərin Qərbi Azərbaycanın tarixi və mədəni irsi haqqında biliklərinin artırılması, gənc nəslin milli-mənəvi dəyərlər və vətənpərvərlik ruhunda maarifləndirilməsi olub. Gələcəkdə belə tədbirlərin ölkənin müxtəlif regionlarında davam etdirilməsi nəzərdə tutulur.