Əvvəlki ilin məzunları bu halda ödəniş etməyəcəklər – DİM rəsmisindən AÇIQLAMA

“Ötənilki məzunların buraxılış imtahanlarının nəticələri bu il də qüvvədədir. Əgər onlar nəticələrini daha da yaxşılaşdırmaq istəyirlərsə, qeydiyyatdan keçib aprelin 19-da üç fənn üzrə yenidən imtahan verməlidirlər”.

“Azərbaycan müəllimi” xəbər verir ki, bunu Dövlət İmtahan Mərkəzinin İctimaiyyətlə əlaqələr və kargüzarlıq departamentinin müdiri Nigar Hüseynova-Didavari deyib.

O, ötənilki məzunlarla bağlı bir məqamı da xatırladıb:

“Əgər abuturiyent builki imtahan nəticəsini gördükdən sonra “Riyaziyyatdan balım daha aşağıdır, amma xarici dilim daha yaxşıdır. Buna görə də builki imtahan nəticəsindən bir fənni, keçənilki imtahan nəticəsinə görə də digər fənni götürüm, buna icazə verilmir. Yəni ümumi nəticə götürülür. Ona görə də keçənilki nəticədən narazı qalanlar bu il yenidən imtahan verməlidirlər. Amma məhz “keçənilki nəticə ilə bu kampaniyada iştirak edəcəyəm”,- deyənlər də var. Proqram buna icazə verir. Qeydiyyatdan keçəndə proqram sizdən soruşur ki, qəbul kampaniyasında keçənilki, yoxsa builki nəticələrlə iştirak etmək istəyirsiniz. Əgər “bu il də iştirak etmək istəyirəm”,- deyirsinizsə, o deməkdir ki, siz keçənilki nəticələrinizdən imtina edirsiniz”.

DİM rəsmisi qeyd edib ki, keçən ilin məzunları üçün imtahanda iştirak ödənişlidir: “Ancaq onlar qəbul kampaniyasının indiki mərhələsində - martın 5-nə qədər olan dövrdə ərizə qəbulunu təsdiqləyəndə seçim etsəsələr ki, biz keçənilki nəticəmizlə iştirak edəcəyik, o zaman onlar üçün təsdiq də ödənişsiz olacaq”.