“Beyin Mərkəzi” layihəsi çərçivəsində tələbələrə sertifikatlar verilib

Azərbaycan Kibertəhlükəsizlik Mərkəzinin həyata keçirdiyi “Beyin Mərkəzi” layihəsi çərçivəsində Sənaye və İnnovasiyalar üzrə Bakı Peşə Təhsili Mərkəzinin tələbələrinin kibertəhlükəsizlik üzrə təlim proqramını uğurla başa vurması münasibətilə sertifikat təqdimetmə mərasimi təşkil olunub.

"Azərbaycan müəllimi" xəbər verir ki, təlim proqramı kibertəhlükəsizlik sahəsində nəzəri və praktiki biliklərin sistemli şəkildə inkişaf etdirilməsinə xidmət edir və iştirakçıların əmək bazarının müasir tələblərinə uyğun peşəkar kadr kimi formalaşmasına şərait yaradır. Bu istiqamətdə ixtisaslı mütəxəssislərin hazırlanması isə ölkənin rəqəmsal təhlükəsizliyinin gücləndirilməsində strateji əhəmiyyət daşıyır.

Proqram çərçivəsində tələbələr informasiya təhlükəsizliyi, şəbəkə təhlükəsizliyi, kibertəhdidlərin aşkarlanması və qarşısının alınması, eləcə də risklərin idarə olunması istiqamətlərində həm nəzəri biliklər, həm də praktiki bacarıqlar əldə ediblər.

Tədbirin əsas hissəsində təlim proqramını uğurla başa vuran tələbələrə sertifikatlar təqdim olunub. Sonda tərəflər arasında kibertəhlükəsizlik sahəsində əməkdaşlığın davam etdirilməsi və bu istiqamətdə yeni təşəbbüslərin həyata keçirilməsi imkanları ətrafında fikir mübadiləsi aparılıb.