Elmir Babayev: Gənclər Akademiyası AMEA-da yeni inkişaf mərhələsinin əsasını qoyur

“AMEA-nın 80 illik fəaliyyəti dövründə mühüm elmi nailiyyətlər əldə olunub, nüfuzlu elmi məktəblər formalaşıb, nəsillərarası bilik ötürülməsi və insan kapitalının yetişdirilməsi istiqamətində ardıcıl tədbirlər həyata keçirilib”.

“Azərbaycan müəllimi” xəbər verir ki, bu fikirləri AMEA-nın elmi təşkilatlarının və ali təhsil müəssisələrinin 2025-ci ildəki fəaliyyətinə həsr olunmuş Ümumi Yığıncaqda AMEA-nın Gənclər Akademiyasının sədri, kimya üzrə fəlsəfə doktoru, dosent Elmir Babayev səsləndirib.

O bildirib ki, son illərdə aparılan islahatlar akademiyada yeni inkişaf mərhələsinin əsasını qoyub.

Elmir Babayev qeyd edib ki, gənclər siyasəti Akademiyanın strateji inkişaf modelinin əsas dayaqlarından biridir. Gənc Alim və Mütəxəssislər Şurasının təşəbbüsü ilə keçirilən elmi tədbirlər, beynəlxalq əməkdaşlıq əlaqələrinin genişləndirilməsi, “Gənc tədqiqatçı” jurnalının fəaliyyətinin inkişafı və gənclərin elmi-ictimai fəallığının stimullaşdırılması bu istiqamətdə görülən işlər sırasındadır.

O, həmçinin vurğulayıb ki, 10 sentyabr 2025-ci ildə AMEA-nın Rəyasət Heyətinin qərarı ilə Gənclər Akademiyası təsis edilib. Bu addımın təkcə struktur deyil, həm də ideya dəyişikliyi olduğunu bildirən sədr qurumun əsas məqsədlərinin innovativ düşüncənin təşviqi, beynəlxalq elmi şəbəkələrə inteqrasiyanın gücləndirilməsi, mentorluq institutunun inkişafı və akademik liderliyin formalaşdırılması olduğunu diqqətə çatdırıb.

Çıxışının sonunda Elmir Babayev Gənclər akademiyanın əsas missiyasının strateji düşüncəyə malik yeni nəsil alimlərin yetişdirilməsi olduğunu vurğulayıb və gənclərin göstərilən etimadı doğruldacaqlarına inamını ifadə edib.