MİQ-in ödənişli olması iştirakçı sayına necə təsir göstərəcək? - MÜTDA rəsmisi açıqladı

"Müəllimlərin işə qəbulu üzrə müsabiqənin statistikasına baxdıqda, namizədlərin böyük marağını görürük. Müsabiqə artıq 10 ildən çoxdur ki, təşkil olunur. İlk illərdə müraciətçilərin sayı bəzi hallarda 10 min nəfəri keçirdisə, son illərdə bu göstərici 50–60 min nəfəri ötüb. Bu, müəllim peşəsinə marağın göstəricisidir".

"Azərbaycan müəllimi" xəbər verir ki, bu fikirləri Məktəbəqədər və Ümumi Təhsil üzrə Dövlət Agentliyinin İmtahan və qiymətləndirmə şöbəsinin müdiri Nurlan İsmayılbəyli Təhsil TV-nin efirində yayımlanan “Təhsildəyik” verilişində səsləndirib.

Şöbə müdiri qeyd edib ki, buna baxmayaraq, hər il namizədlərin təxminən 18%-i ümumiyyətlə, prosesdə iştirak etmir: "Halbuki onlar üçün suallar hazırlanır, nəzarətçilər ayrılır, texniki hazırlıq görülür və bu, ciddi resurs tələb edir. İştirak etməmək xərclərin israfına səbəb olur. Eyni zamanda, bəzi fənlər üzrə namizədlərin yarısı və ya yarıdan çoxu müsabiqə üçün müəyyənləşdirilmiş minimum 40 bal tələbi belə ödəyə bilmir”.

N.İsmayılbəyli əlavə edib ki, MİQ-in ödənişinin məbləğinin müəyyən edilməsi qanunvericilik çərçivəsində tənzimlənir və proses davam edir. Bununla bağlı yekun qərarlar ictimaiyyətə açıqlanacaq.

MİQ-in ödənişli olmasının iştirakçı sayının azalmasına səbəb olub-olmayacağı haqqında da danışan N.İsmayılbəyli bildirib ki, bunu indidən proqnozlaşdırmaq çətindir: "Çünki müsabiqəyə maraq kifayət qədər yüksəkdir. Yaz aylarından etibarən qeydiyyatla bağlı çoxsaylı müraciətlər daxil olur. Əsas məqsəd dövlət ümumi təhsil müəssisələrinə ən uyğun namizədlərin seçilməsi və bunun şagird nailiyyətlərinə müsbət təsir göstərməsidir", – deyə o söyləyib.