Müəllim vakansiyaları gizlədilirmi? – İddialara rəsmi münasibət

"Bir müəllimin işdən çıxması və ya təqaüdə getməsi avtomatik olaraq yeni vakansiya yaranması demək deyil. Bəzi məktəblərdə tələb olunandan artıq sayda müəllim ola bilər. Məsələn, faktiki 10–12 ibtidai sinif olduğu halda 15–16 ibtidai sinif müəllimi fəaliyyət göstərə bilər. Bu halda 2–3 müəllimin işdən çıxması yeni müəllim ehtiyacı yaratmır".

"Azərbaycan müəllimi" xəbər verir ki, bu fikirləri Məktəbəqədər və Ümumi Təhsil üzrə Dövlət Agentliyinin İmtahan və qiymətləndirmə şöbəsinin müdiri Nurlan İsmayılbəyli Təhsil TV-nin efirində yayımlanan “Təhsildəyik” verilişində səsləndirib.

O, məktəbdə vakansiyaların elan olunmadan tutulması məsələsinə münasibət bildirərək qeyd edib ki, texniki olaraq bu, mümkün deyil: "Müəllimlərin dərs yükü və əməkhaqlarının ödənilməsində ölkə üzrə vahid mühasibatlıq sistemi tətbiq olunur. Yəni texniki olaraq vakansiyanın gizlədilməsi mümkün deyil".

N.İsmayılbəyli bildirib ki, bir müəllimin işdən ayrılması yeni bir vakansiya demək deyil: "Az saatlı fənlər üzrə isə müəllim yaxın ərazidə yerləşən digər məktəbdə də dərs deyə bilər. Bu, sistemdə çalışan müəllim üçün əlavə motivasiya və sosial rifahın yaxşılaşması deməkdir", – deyə o qeyd edib.