Çempion olsalar da, peşə təhsilini seçdilər - Əkizlərin hekayələri

- Əli, zəng vuruldu, dərsə yubanırsan, sinfə get!

- Yaxşı, müəllim, sinfə gedirəm, amma mən Əli yox, Həsənəm.

Bu dialoqu Naxçıvan Dövlət Peşə Təhsil Mərkəzinin dəhlizində eşidirik. Və öyrənirik ki, mərkəzin 1-ci kurs tələbələri olan Əli və Həsən Oktyabrski qardaşları əkizdirlər. Müəllimləri və sinif yoldaşları bəzən onları səhv salsa da, onların hər birinin ayrı peşə seçimi var.  Maraqlıdır, onları eyni peşə məktəbinə hansı istək gətirib?

“Azərbaycan müəllim” olaraq, tələbələri tanımaq və tanıtmaq üçün onlarla söhbətləşirik.

Qardaşlar 2008-ci ildə Naxçıvanda anadan olublar. Həsən mərkəzdə “Dəmir yolu və süni qurğuların təmiri və cari saxlanması” ixtisasında təhsil alır. Deyir ki, hər peşənin öz gözəlliyi var, amma onun məhz bu peşəyə marağı olub: “Gələcəkdə Zəngəzur yolu açılanda bu ixtisasa daha da ehtiyac olacaq. Valideynlərimin həm mənə, həm də qardaşıma böyük dəstəyi olub. Sosial şəbəkələrdə də peşə məktəbi ilə bağlı vidoçarxları gördük və bizdə də peşə təhsilinə qarşı maraq yarandı”.  

Artıq yarım təhsil ilini geridə qoyublar və imtahanları veriblər. İndi hər ikisi həm də müəssisələrə praktikaya gedirlər. Gələk, bizi və əminəm ki, sizi də maraqlandıran əsas suala - oxşarlıqlarının mənfi və müsbət tərəfləri varmı?  

“İlk vaxtlar müəllimlər bizi daha çox qarışdırırdılar, amma tələbə yoldaşlarımız artıq bizi tanımağa başlayıb”, - deyir hər ikisi də. Bir-birilərinin imtahanlarına girdiklərini deməsələr də, əslində bunun onlar üçün avantaj olduqlarını özləri gülə-gülə etiraf edirlər. Həm də onlar dərslərini hazırlamaq üçün də bir-birinə dəstək olurlar, birinin uğurunu digəri öz uğuru kimi qəbul edir.

Əli və Həsən qardaşları həm də idmançıdırlar. Onlar keçən il Naxçıvan şəhərində - İlham Əliyev adına Olimpiya İdman Kompleksində “Zərərli vərdişlərə yox deyək, həmişə sağlam olaq!” devizi ilə yeniyetmələr arasında sərbəst güləş üzrə Muxtar Respublika birinciliyində müvafiq çəki dərəcələri üzrə birinci olublar. Hətta onlar musiqi məktəbinə də gediblər. Amma bütün bunlara baxmayaraq peşə məktəbini seçiblər.

Əli Oktyabrski isə Naxçıvan Dövlət Peşə Təhsil Mərkəzinin “Mebel ustası” ixtisasında təhsil alır. O da qardaşı kimi buranı bitirəndən sonra ali məktəbə sənəd verməyə hazırlaşır. Onları çoxları seçə bilməsə də, Əli xarakter cəhətdən oxşar olduqlarını deyir: “Hər bir şeyimiz demək olar ki, eynidir. Gələcəkdə ailə biznesi qurmaq niyyətimiz də var.  Dəsrlərimiz çox maraqlı keçir. Nəzəriyyəni demək olar ki, öyrənmişik, indi isə praktikaya gedirik. Müəllimlər bizə çox dəstək olurlar, çalışırlar ki, daim yeni nəsə öyrətsinlər”.

Əli mebel ustası olmağı özü istəyib, ona görə də peşəsinə marağı çoxdur. Oduncaq taxta üzərində oymalar hazırlayır. 
Onlar evdən eyni saatda çıxır, məktəbə gəlir, sonra bir yerdə evə qayıdırlar. Bütün vaxtlarını birlikdə keçirən qardaşlar bəzən qardaş, bəzən isə tələbə yoldaşı olurlar. Tənəffüslərdə də mütləq birlikdə büfetə gedirlər, onların hətta dostları da eynidir.

“Gələcəkdə uğur əldə etmək üçün peşə məktəbi ən yaxşı seçimdir”, - deyə qardaşlar tövsiyə edir və əlavə edilər: “Hər həs ali məktəblərə getmək istəyir, amma işini yaxşı bilən peşə sahiblərinə də ehtiyac var. Peşə təhsili bir fürsətdir və onu dəyərləndirmək lazımdır. Bu qərar gələcək həyatlarında uğura yol açar. Bura gənclər üçün çox əlverişlidir”.

Onlar bura gələndən sonra yeni fikirləri, yeni düşüncələr formalaşıb. Bunu biz yox, özləri deyir.