“İdman qızları daha güclü edir” - Naxçıvanda dünya çempionu olan ilk qız

Naxçıvan idman tarixində bir ilkə imza atan gənc idmançı Röya Abdullayeva qazandığı uğurlarla təkcə öz adını deyil, bütöv bir bölgənin idman salnaməsini yazıb. Onun dünya və Avropa arenalarında əldə etdiyi qələbələr əzmin, zəhmətin və inamın real nəticəsi kimi bu gün gənclər üçün nümunəyə çevrilib.

“Azərbaycan müəllimi” universal döyüş üzrə dünya çempionatının qızıl medalını qazanan Röya Abdullayeva ilə həmsöhbət olub. 
O, Naxçıvan idmanı tarixində dünya çempionu olan ilk qız idmançı kimi adını tarixə yazdırıb. Bu uğur, eyni zamanda, qızların döyüş idman növlərində qazandığı nailiyyətlərin yeni mərhələyə yüksəldiyini göstərir.

Röya Abdullayeva 8 oktyabr 2008-ci ildə Naxçıvan şəhərində  doğulub. Naxçıvan şəhəri 5 nömrəli tam orta məktəbi bitirib, hazırda Azərbaycan İdman Akademiyasının 1-ci kurs tələbəsidir.

Naxçıvan Kikboksinq Federasiyasının və “Turan” Döyüş Klubunun idmançısı olan Röya Abdullayeva Bakıda keçirilən qrapplinq üzrə Avropa çempionatında da qızıl medal qazanaraq daha bir mühüm uğura imza atıb. Bununla o, 17 yaşadək qızlar arasında qrapplinq üzrə Avropa çempionu olan ilk Azərbaycan idmançısı kimi də tarixə düşüb.

Gənc idmançı bu uğurların arxasında illərin zəhmətinin dayandığını vurğulayır: “Əsasən MMA və qrappling idman növləri ilə məşğul oluram. Bu sahədə uzun müddətdir çalışıram və müxtəlif səviyyəli yarışlarda iştirak etmişəm. Əldə etdiyim əsas uğurlarım arasında universal döyüş üzrə dünya çempionluğu, grappling üzrə Avropa çempionluğu yer alır. Bundan əlavə, həm MMA, həm kikboksinq, həm də grappling üzrə Azərbaycan çempionu olmuşam. Bu nəticələr mənim üçün sadəcə titul deyil, uzun illərin zəhmətinin nəticəsidir. Məqsədim bu sahədə daha da inkişaf edib, beynəlxalq arenada daha böyük uğurlar qazanmaqdır”.

Qələbə anını xatırlayan Röya həmin anın onun həyatında xüsusi yer tutduğunu bildirir: “O an çox fərqli idi. Uzun müddət çəkdiyim əziyyət, ağır məşqlər, yorğunluq hamısı bir anda yadıma düşdü. Çox böyük sevinc və qürur hiss etdim. Eyni zamanda daxilimdə bir rahatlıq oldu ki, bütün zəhmətimin qarşılığını aldım”.

Röya deyir ki, dünya və Avropa çempionu olmaq həm böyük uğur, həm də məsuliyyətdir: “Çünki artıq təkcə özümü yox, ölkəmi təmsil edirəm. Bu titullar məni daha çox çalışmağa və daha yüksək hədəflər qoymağa sövq edir”.

Naxçıvan idmanı tarixində ilk qız dünya çempionu olmaq isə onun üçün ayrıca qürur mənbəyidir: “Bu mənim üçün çox qürurverici, eyni zamanda məsuliyyətdir. Çünki səndən sonra gələnlər üçün bir nümunə olursan. İstəyirəm ki, bu uğur digər qızlara da cəsarət versin”.

Onun idman yolu uşaqlıq marağından başlayıb. Bu yolda ailəsinin, xüsusilə də atasının rolu böyük olduğunu deyir: “Bu sahəyə gəlməyimdə ailəmin, xüsusilə də atamın rolu çox böyükdür. Hər zaman yanımda olub, dəstək verib və bu yolda mənə inanıb”.
Atası Xəyal Abdullayev eyni zamanda onun həm də məşqçisidir. Deyir ki, uğur qazanmaqda atasının həm ata, həm də məşqçi kimi ona dəstək verməsi mühüm rol oynayıb: “Bu mənim üçün çox böyük üstünlükdür. Bəli, bəzən çətin olur, çünki məşqlərdə çox tələbkar olur. Amma bu gün əldə etdiyim uğurlarda onun rolu danılmazdır. Bu fürsətdən istifadə edib, atama həm ata kimi, həm də məşqçi kimi mənə verdiyi dəstəyə görə təşəkkür etmək istəyirəm”.

Röya bildirir ki,  bu idman növlərində uğur qazanmaq üçün səbir, intizam və davamlılıq əsas şərtlərdir: “Ən əsas keyfiyyətlər səbir, intizam və davamlılıqdır. Fiziki güc vacibdir, amma psixoloji olaraq güclü olmaq daha önəmlidir. Uduzanda belə davam etməyi bacarmaq lazımdır”.

Azərbaycan çempionu olması onun karyerasında yeni mərhələnin başlanğıcı olub: “Bu uğurlar mənə özümə inam verdi. Daha böyük yarışlara çıxmaq üçün motivasiya oldu və məsuliyyətimi artırdı”.

Çempionatlara  hazırlıq prosesi isə heç də asan olmayıb. Gənc çempion deyir ki, həmişə hazırlıqlar çox gərgin keçib: “Gündəlik intensiv məşqlər olurdu, həm texniki, həm fiziki, həm də taktiki hazırlıq üzərində işləyirdim. Ən çətin tərəfi yorğunluq və bəzən psixoloji yüklənmə idi”.

Röya qələbəyə aparan əsas amilin davamlılıq və intizam olduğunu deyir: “Əsas amil davamlılıq və disiplin oldu. Hər gün planlı şəkildə məşq edirdim. Adətən gündə 2 dəfə, ümumilikdə 3–5 saat məşq edirəm”.

İdmançı qızların döyüş idman növlərinə marağının artmasını da müsbət qiymətləndirir:  “Son vaxtlar qızların bu sahəyə marağı xeyli artıb və bu çox sevindiricidir. Bu idman növləri onları həm fiziki, həm də psixoloji olaraq daha güclü edir”.

Gələcək planları isə daha böyük hədəflərə yönəlib: “Gələcəkdə daha böyük beynəlxalq yarışlarda iştirak edib yeni titullar qazanmaq istəyirəm. Məqsədim daha yüksək səviyyəyə çatmaq və ölkəmi daha böyük arenalarda təmsil etməkdir. Ən böyük motivasiyam qazandığım uğurlar və ailəmin mənə olan inamıdır. Bu mənə hər zaman irəli getmək üçün güc verir”.

İdman və təhsili paralel aparan gənc idmançı bunun düzgün planlama ilə mümkün olduğunu vurğulayır: “Mən İdman Akademiyasında təhsil alıram və bu mənə həm oxumağı, həm də məşqləri daha düzgün balanslaşdırmağa kömək edir. Planlı şəkildə hər ikisini çatdırmağa çalışıram”.

Onun gənclərə mühüm mesaj var: “Heç vaxt tez təslim olmasınlar. Daim çalışsınlar və özlərinə inansınlar. Uğur bir anda gəlmir, amma zəhmət mütləq qarşılığını verir”.

Röya Abdullayevanın uğur yolu göstərir ki, məqsədə doğru atılan hər addım, çəkilən hər zəhmət gec-tez öz bəhrəsini verir. Onun qazandığı qələbələr bu gün təkcə şəxsi nailiyyət deyil, həm də Azərbaycan gəncliyi, xüsusən də qız idmançılar üçün ruhlandırıcı örnəkdir.