Layihə rəhbəri: DP çərçivəsində 230-dan çox xarici universitetdə təhsil almaq imkanı yaradılıb 

“Dövlət Proqramı çərçivəsində 33 ölkənin 230-dan çox universitetinə müraciət etmək mümkündür”.

“Azərbaycan müəllimi” xəbər verir ki, bunu “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı”na sənəd qəbulu ilə bağlı jurnalistlərə açıqlamasında Dövlət Proqramı İdarəetmə Qrupunun layihə rəhbəri Qədir Xəlilov deyib.

Layihə rəhbərinin sözlərinə görə, bu çərçivədə 4 mindən artıq təhsil proqramı mövcuddur.

Q.Xəlilov qeyd edib ki, Dövlət Proqramında 15 prioritet ixtisas istiqaməti müəyyənləşdirilib və ötən ildən etibarən proqramda bir sıra yeniliklər tətbiq olunub.

Yeniliklərdən biri doktorantura səviyyəsi üzrə də müraciət imkanının yaradılmasıdır. Eyni zamanda, mədəniyyət və incəsənət sahəsi prioritet istiqamətlər sırasında olduğundan bu sahələr üzrə təhsil almaq istəyən şəxslər üçün də müraciət imkanları genişləndirilib.

Layihə rəhbəri vurğulayıb ki, mədəniyyət və incəsənət istiqaməti üzrə müraciət edilə bilən universitetlərin sayı 20-yə qədər artırılıb.