LDU-da UNEC-lə birgə tədbir keçirilib

Lənkəran Dövlət Universitetində (LDU) Azərbaycan Dövlət İqtisad Universitetinin (UNEC) birgə təşkilatçılığı ilə “Elmin populyarlaşdırılması” mövzusunda tədbir keçirilib.

Bu barədə LDU-dan “Azərbaycan müəllimi”nə məlumat verilib. Bildirilib ki, tədbiri giriş sözü ilə Lənkəran Dövlət Universitetinin rektoru professor Natiq İbrahimov açaraq cəmiyyətdə elmi dünyagörüşünün formalaşdırılmasının, təbliğinin vacibliyini qeyd edib. Keçirilən tədbirin maraqlı mövzuya həsr olunduğunu deyən rektor iştirakçıları çıxışlar ətrafında səmimi dialoqa, elmi diskussiyaya dəvət edib. Professor N.İbrahimov LDU-da son illərdə bu istiqamətdə görülən işlərdən, elmi jurnalların nəşrindən, yeniliklərdən və qarşıda həllini gözləyən məsələlərdən danışıb.

UNEC-in Elm və İnnovasiya məsələləri üzrə prorektoru Rövnəq Rzayev, rektorun müşaviri Elşən Bağırzadə, “Elmin Populyarlaşdırılması Mərkəzi”nin rəhbəri Etibar Əliyev çıxışlarında mövzu ilə bağlı maraqlı nüanslara toxunublar. Çıxışlarda Azərbaycan Dövlət İqtisad Universitetinin bu sahədə qazandığı uğurlardan ətraflı söz açılıb, LDU ilə UNEC arasında birgə elmi əməkdaşlığın səmərəli olacağı bildirilib. Dünyada və ölkədə elmin populyarlaşdırılması vəziyyəti müzakirə edilib, iştirakçıları maraqlandıran suallar cavablandırılıb. UNEC-li qonaqlar LDU kitabxanasına universitetin yeni nəşrlərini hədiyyə ediblər.