Əməkdar artist Aybəniz Haşımova Nizami Muzeyini ziyarət edib

Əməkdar artist Aybəniz Haşımova Nizami Muzeyini ziyarət edib

Tanınmış müğənni və pedaqoq, Azərbaycan Respublikasının Əməkdar artisti, Sənət Akademiyasının təsisçisi və rəhbəri, Türk Ağsaqqalları İctimai Birliyinin Mədəniyyət Komitəsinin sədri Aybəniz Haşımova Nizami Gəncəvi adına Milli Azərbaycan Ədəbiyyatı Muzeyinin qonağı olub.

Qonağa muzey ekspozisiyası ilə bağlı ətraflı məlumatı Beynəlxalq əlaqələr və dünya muzeyləri şöbəsinin böyük elmi işçisi Gülnar Əqiq təqdim edib.

Aybəniz Haşımova Nizami Muzeyinin ekspozisiya salonlarını seyr etdikcə öz heyranlığını gizlədə bilməyib. Muzey ekspozisiyasının rəngarəng strukturu, qiymətli eksponatlar ziyarətçidə böyük maraq doğurub. 

Qonağın diqqətini xüsusilə Azərbaycanın musiqi mədəniyyətinə həsr olunmuş ekspozisiya guşələri, o cümlədən oğuz türklərinin qəhrəmanlıq dastanı “Kitabi-Dədə Qorqud”da adı çəkilən qədim xalq musiqi aləti qopuz, müsəlman Şərqinin ilk operası “Leyli və Məcnun”a həsr olunmuş güşə və tanınmış kamança ustası Habil Əliyevin əzəmətli heykəli cəlb edib. 

Əməkdar artist muzeylə tanışlıqdan məmnunluğunu ifadə edərək burada müşahidə etdiyi mədəniyyətə və sənətə verilən dəyərə, ziyarətçilərə göstərilən yüksək və peşəkar xidmətə, səmimi münasibətə görə muzeyin rəhbərliyinə və əməkdaşlara minnətdarlığını bildirib.

Nizami Muzeyinin qədim və zəngin Azərbaycan mədəniyyətini qoruyub yaşadan məkan olduğunu söyləyən Aybəniz Haşımova muzeylə bağlı xoş təəssüratlarını “Rəy kitabı”nda bölüşüb.