Yaşıl dünyanın Qarabağ modeli

Dekabrın  25-də  "Yaşıl dünya naminə həmrəylik ili" və "Yaşıl UNEC ili" çərçivəsində UNEC Qarabağ İqtisadi Araşdırmalar Mərkəzi və Tədqiqat Mərkəzlərinin İşinin Əlaqələndirilməsi və Təşkili şöbəsinin təşkilatçılığı, "Baku Steel Company" QSC-nin dəstəyi ilə keçirilən "Yaşıl dünyanın Qarabağ modeli" adlı ümumrespublika elmi məqalə müsabiqəsinin yekununa həsr olunmuş tədbir keçirilib.

“Azərbaycan müəllimi” xəbər verir ki, tədbir ölkə başçısı İlham Əliyev tərəfindən elan olunmuş 2024-cü ilin "Yaşıl dünya naminə həmrəylik ili"nə həsr olunub.

Tədbirdə çıxış edən Milli Məclisin deputatları Vüqar Bayramov, Tural Gəncəliyev, UNEC-in elm və innovasiyalar üzrə prorektoru professor Rövnəq Əliyev, UNEC Qarabağ İqtisadi Araşdırmalar Mərkəzinin rəhbəri professor Şəfa Əliyev ali təhsil müəssisələrinin professor-müəllim heyətinin, gənc tədqiqatçılarının müsabiqədə iştirakını yüksək qiymətləndirmiş, Qarabağda yaşıl iqtisadi zonanın yaradılması, infrastrukturun bərpası yollarına həsr olunmuş elmi-tədqiqatların əhəmiyyətindən danışmışlar. Azərbaycanın yaşıl  dünya modelinin bütün dünya üçün örnək olduğunu deyən natiqlər qeyd ediblər ki, bir sıra xarici qüvvələrin riyakar səylərinə baxmayaraq ölkəmizdə COP29 tədbiri böyük uğurla başa çatıb.

Müsabiqədə baxılan elmi istiqamətlər ilboyu Azərbaycanda  uğurla  reallaşdırılan və qlobal iqlim dəyişkilikləri ilə bağlı problemlərə həsr olunan COP29 kontekstində müstəsna əhəmiyyət kəsb edib. Müsabiqə iştirakçılarının təqdim etdikləri məqalələrdə alterativ enerji resurslarının formalaşdırılması, yaşıl iqtisadiyyat quruculuğunun tərkib elementlərinin müəyyənləşdirilməsi, Qarabağın “yaşıl” iqtisadiyyat və “yaşıl” enerji sahəvi strukturunun formalaşdırılması, xüsusilə günəş enerjisindən səmərəli istifadə edilməsi, su mənbələrinin ehtiyatlarının qiymətlə endirilməsi, regionun ekoloji problemlərinin həll olunması problemləri və həlli yolları daha çox aktuallıq təşkil edib.

Müsabiqənin Təşkilat Komitəsinin ünvanına ölkənin müxtəlif elm və ali təhsil müəssisələrindən, tədqiqat institutlarından və mərkəzlərindən, müstəqil tədqiqatçılardan 90 məqalə daxil olub. Məqalələrin qiymətləndirilməsi zamanı əsas meyarlara məqalənin adının məzmuna uyğunluğu; aktuallığı; elmi məzmunu; praktikliyi və əsaslandırma dərinliyi müəyyənləşdirilib.

Müsabiqədə iştirak edən müəlliflərin coğrafi dairəsi ölkəmizin əksər universitetlərini və elmi-tədqiqat müəssisələrini, o cümlədən Azərbaycan Dövlət İqtisad Universiteti, Bakı Dövlət Universiteti, Azərbaycan Dövlət Neft və Sənaye Universiteti, Naxçıvan Dövlət Universiteti, Bakı Mühəndislik Universiteti, Azə rbaycan Dövlət Pedaqoji Universiteti, Xəzər Universiteti, Azərbaycan Texniki Universiteti, Azərbaycan Texnologiya Universiteti, Azərbaycan Memarlıq və İnşaat Universiteti, Sumqayıt Dövlət Universiteti, Bakı Biznes Universiteti, Mingəçevir Dövlət Universiteti, Azərbaycan Dillər Universiteti, Azərbaycan Kooperasiya Universiteti, Azərbaycan Universiteti, Gəncə Dövlət Universiteti, Azərbaycan Dövlət Dəniz Akademiyası, Milli Aerokosmik Agentliyinin Ekologiya İnstitutu, Elm və Təhsil Nazirliyinin Torpaqşünaslıq və Aqrokimya İnstitutunu və s. əhatə edib.

Müsabiqənin yekunu olaraq, professor-müəllim heyəti və doktorant, magistr və tələbələr üçün iki nominasiya üzrə hər bir nominasiyada ilk 3 yeri tutanlara pul mükafatları verilib. Bundan əlavə, hər iki nominasiya üzrə 13, cəmisi 26 nəfər elmi məqalə müsabiqəsi iştirakçıları sertifikatlara layiq görülüblər. Ümumilikdə 80 məqalənin toplu şəkildə elektron – kitab formatında nəşr edilməsi və UNEC-in rəsmi saytında yerləşdirilməsinə qərar verilib.