AzMİU-da Elektron Universitet Sisteminin yeni modulu təqdim edilib

Azərbaycan Memarlıq və İnşaat Universitetində (AzMİU) rəhbər heyətinə Elektron Universitet Sisteminin “Alt dərslərə müraciətin avtomatlaşdırılması” moduluna dair təqdimat keçirilib. 

Universitetdən “Azərbaycan müəllimi”nə bildirilib ki, tədbirdə İKT Mərkəzinin direktoru Sərxan Talıbzadə 2023/2024-cü tədris ilinin yay sessiyasında istifadəyə verilmiş “Təkrar imtahanlara avtomatlaşdırılmış müraciət” modulunun tətbiqindən əvvəl və sonra aparılmış statistik nəticələr haqqında hesabat təqdim edib.

Daha sonra Tədrisin elektronlaşdırılması şöbəsinin müdiri Aynur Dərişova 2024/2025-ci tədris ilinin Qış imtahan sessiyasında istifadəyə veriləcək “Altdan dərslərə onlayn müraciət” modulu haqqında məlumat verib. O, yeni modulun tələbələrin dərs seçimi prosesini sadələşdirəcəyini və daha şəffaf edəcəyini vurğulayıb.

Təqdimatın sonunda çıxış edən fakültə dekanları Elektron Universitet Sisteminin universitetin tədris fəaliyyətində məlumat mübadiləsini sürətləndirdiyini, eyni zamanda vahid mənbədən əldə olunan informasiyaların dəqiqliyini və etibarlılığını təmin etdiyini xüsusi qeyd ediblər.

Qeyd edək ki, tədbir universitetin tədris prosesində rəqəmsal texnologiyaların geniş tətbiqini təşviq etmək məqsədi daşıyıb.