Bakıda “World Harmony” VII Beynəlxalq müsabiqəsi keçirilib

Dekabrın 22-dən 24-dək Azərbaycanda “World Harmony” VII Beynəlxalq müsabiqəsi keçirilib.

“Azərbaycan müəllimi” xəbər verir ki, Üzeyir Hacıbəyli adına Bakı Musiqi Akademiyası ilə “Harmoniya” Gürcü Klassik və Folklor Musiqisinin İnkişaf Birliyinin birgə təşkilatçılığı ilə keçirilən beynəlxalq müsabiqədə gənc musiqiçilər fərqli yaş qrupları üzrə müxtəlif ifa alətləri ilə çıxış ediblər.

Müsabiqənin münsiflər heyətinin rəhbəri SSRİ və Azərbaycan Respublikasının Xalq artisti, Bakı Musiqi Akademiyasının rektoru professor Fərhad Bədəlbəyli (Azərbaycan) və müsabiqənin həmsədri isə Əməkdar müəllim, Bakı Musiqi Akademiyasının tədris işləri üzrə prorektoru, professor Nərminə Quliyeva (Azərbaycan) olub. Münsiflər heyətində müxtəlif ölkələrdən gələn və Azərbaycanın digər tanınmış mütəxəssisləri də yer alıb.

Müsabiqənin bağlanış mərasimində çıxış edən professor Nərminə Quliyeva çıxış edərək səkkiz nominasiya, 4 və 5 yaş kateqoriyası üzrə keçirilən müsabiqənin əhəmiyyətindən danışıb. O, bu müsabiqədə ənənəvi nominasiyalardan başqa, fortepiano, simli və nəfəsli alətlər, konsertmeyster sinfi, xor-dirijorluq sinfi, ümumi fortepiano, kamera ansamblı kimi nominasiyaların əlavə olunmasını qeyd edib. Sadalanan xüsusiyyətlərə görə “World Harmony” beynəlxalq müsabiqəsi tarixində belə böyük miqyaslı müsabiqənin məhz Azərbaycanda keçirilməsindən qürur duyduğunu bildirib. Həmçinin gənc istedadların bacarıqlarının üzə çıxarılmasında bu müsabiqənin mühüm rolundan söz açıb, əhəmiyyətini vurğulayıb və qalib ifaçıları təbrik edərək onlara yeni nailiyyətlər arzulayıb.

Beynəlxalq münsiflər heyətinin üzvləri Tsinino Biçikaşvili, Vilnus və Kosta-Rika Musiqi Akademiyalarının professoru Ala Bendoraitiene, professor Rustam Şayxutdinov müsabiqənin yüksək səviyyədə təşkil olunmasından məmnunluqlarını qeyd edib, öz ürək sözlərini bölüşüblər.

Nəfəs və zərb alətləri kateqoriyasında Fərid Hacıyev (Azərbaycan), fortepiano üzrə Bachi Mikeladze (Gürcüstan) və Pavel Kolbasov (Rusiya), simli alətlər üzrə Xədicə Qasımova (Azərbaycan), vokal üzrə Dinara Tausheva (Qazaxıstan) "Qran-pri" mükafatına layiq görülüb. Vokal ifaçısı Aydan Quliyeva isə I yeri tutub.

Qaliblər diplom və müxtəlif hədiyyələrlə təltif olunublar.

Qeyd edək ki, "World Harmony" VII Beynəlxalq müsabiqəsi musiqi sahəsinin inkişafı və gənc musiqiçilərin beynəlxalq miqyasda tanıdılması baxımından böyük əhəmiyyət kəsb edir. Bu tədbir, həmçinin yeni istedadların üzə çıxmasına, müxtəlif ifaçılıq məktəblərinin ənənələrinin qorunmasına və musiqi sahəsində yeni əməkdaşlıq imkanlarının yaranmasına səbəb olub. Gələcəkdə bu cür tədbirlərin daha da inkişaf etdirilməsi və gənc musiqiçilərin dünya səviyyəsində tanıdılması məqsədilə davamlı olaraq təşkil olunması musiqi sahəsində yeni istedadların üzə çıxmasına və təhsil sahəsinin inkişafına böyük töhfələr verəcək.