SpaceX-in kosmik gəmisi Atlantik okeanı üzərində partlayıb

"SpaceX" şirkətinə məxsus "Starship" raketdaşıyıcı kosmik gəmisi sınaq uçuşu zamanı Atlantik okeanı üzərində partlayıb.

"Azərbaycan müəllimi" xəbər verir ki, bu barədə "Space.com" nəşri məlumat yayıb.

Uçuş zamanı raketdə anomaliya qeydə alınıb və buraxılışdan təxminən 8,5 dəqiqə sonra Yer atmosferində partlayıb. Partlayış nəticəsində Karib dənizi üzərində göydə onlarla parlaq işıq görünüb. Yerli sakinlər bu mənzərədən heyrətləniblər.

Şirkət "Starship" meqaraketinin yeddinci sınaq uçuşunu Cənubi Texasdakı "Starbase" bazasından həyata keçirib. 123 metrlik aparat uğurla işə düşsə də, sonradan problemlə üzləşib.

"SpaceX"in rəhbəri İlon Mask "X" sosial şəbəkəsində "Starship" kosmik gəmisinin prototipinin yeddinci sınaq buraxılışı zamanı baş verən qəzanın səbəbinin yanacaq sızması olduğunu bildirib. O qeyd edib ki, bu nasazlıq növbəti sınaq uçuşlarının təxirə salınmasına səbəb olmayacaq.

"Mühərrik yanğından mühafizə arakəsməsinin üstündə oksigen və ya yanacaq sızması baş verib", - deyə İ.Mask ilkin səbəbləri açıqlayıb.