Quba-Xaçmaz bölgəsində fənn olimpiadalarında uğur qazanan şagirdlərin sayı artıb

Respublika fənn olimpiadalarının yarımfinal mərhələsində Quba-Xaçmaz regionu üzrə keçən şagirdlərin sayında bu il artım olub.

"Azərbaycan müəllimi" xəbər verir ki, Quba-Xaçmaz Regional Təhsil İdarəsinin əhatə etdiyi rayonlar üzrə təhsil müəssisələrindən 741 şagird yarımfinal mərhələsində iştirak etmək hüququ qazanıb.

Ötən illə müqayisədə yarımfinal turuna keçmiş şagirdlərin sayında 90 nəfər artım qeydə alınıb.

Qeyd edək ki, Xaçmaz rayonu üzrə 237, Quba rayonu üzrə 181, Qusar rayonu üzrə 110, Şabran rayonu üzrə 124 və Siyəzən rayonu üzrə isə 89 şagird yarımfinal mərhələsinə vəsiqə qazanıb. Ümumilikdə isə Respublika fənn olimpiadasının 22 dekabr 2024-cü il tarixində keçirilən birinci mərhələsində Quba-Xaçmaz Regional Təhsil İdarəsinin əhatə etdiyi rayonlar üzrə təhsil müəssisələrindən 3961 şagird iştirak edib.

Xatırladaq ki, Respublika fənn olimpiadalarının rayon (şəhər) mərhələsinin nəticələri bir necə gün əvvəl elan olunub.