Ekspert: Kiçikyaşlı şagirdlər smartfonların müstəqil istifadəsinə hazır deyillər

Tədris prosesində diqqəti yayındırdığı üçün dünyanın təxminən hər dörd ölkəsindən biri məktəblərdə telefonların istifadəsini qadağan edib. Beynəlxalq ekspertlərin fikrincə, hətta işlətməsə belə, şagirdin yanında bir telefonun olması onun diqqətinin yayınması üçün kifayətdir. 

Azərbaycan da məktəblərdə telefonlardan istifadəni qadağan edən ölkələrdəndir. Artıq 300-dək ümumtəhsil müəssisəsində qadağalar qüvvəyə minib. Ancaq təhsil ictimaiyyətinin də məsələyə yanaşması birmənalı deyil. Elm və Təhsil Nazirliyi yanında İctimai Şuranın üzvü, Azərbaycan Özəl Təhsil Müəssisələri Assosiasiyasının sədri Heydər Eminli hesab edir ki, smartfonlardan dərsdə istifadə ilə bağlı müxtəlif fikirlər var: 

“Fikrimcə, smartfonlar dərs zamanı yalnız öyrənməyə xidmət edirsə, o zaman istifadə oluna bilər. Ancaq bu məsələ məktəbin xüsusi mexanizmləri ilə tənzimlənməlidir”.

Ekspertin qənaətinə görə, müəyyən texnologiyalar bəzi kontekstlərdə faydalı ola bilər, amma onlardan həddindən artıq çox istifadə faydalı olmur. Əksinə, fikrin yayınmasına gətirib çıxarır, şagirdlərin dərsə köklənməsini əngəlləyir. Mobil telefonun yaxınlıqda hətta istifadəsiz şəkildə olması belə şagirdlərin dərs prosesinə köklənməsinə imkan vermir.

Smartfonların dərsdə şagirdlərdə qalmasının nəticələri ilə bağlı müxtəlif qlobal hesabatların olduğunu deyən H.Eminli onlardan birinə - UNESCO hesabatına istinad edərək qeyd edib ki, Britaniya, Belçika, İspaniya kimi ölkələrdə smartfonların sinif otağından kənarlaşdırılması öyrənmə nəticələrinə müsbət təsir göstərib. Hətta zəif oxuyan uşaqlar belə, smartfon yanlarında olmayanda daha yaxşı nəticə göstəriblər:

“Həmçinin məktəb daxilində smartfondan istifadə şagirdin rəqəmsal təhlükəsizliyini təhdid edir. Bu, konfidensiallıq, şəxsi məlumatların yayılması kimi problemlər yarada bilər. Xüsusən də kiçikyaşlı şagirdlər smartfonların müstəqil istifadəsinə emosional cəhətdən hazır deyillər”.

Mütəxəssisin fikrincə, bütün bunlara baxmayaraq, texnoloji alətlər dərs zamanı yalnız öyrənməyə xidmət edirsə, sinif otağına buraxıla bilər.