"Student Edition: Voleybol Turniri" layihəsinin final mərhələsi keçirilib

"Student Edition: Voleybol Turniri" layihəsinin final mərhələsi keçirilib

Elm və Təhsil Nazirliyi tərəfindən elan olunan Təhsildə inkişaf və innovasiyalar üzrə VIII qrant müsabiqəsinin qalibi olan "Student Edition: Voleybol Turniri" layihəsinin final mərhələsi və bağlanış mərasimi keçirilib. 

“Azərbaycan müəllimi” xəbər verir ki, tədbirdə məktəbin direktoru, müəllimlər və şagirdlər iştirak ediblər.

Layihə çərçivəsində Şirvan şəhər T. Bağırov adına 11 nömrəli tam orta məktəbdə IX-XI sinif şagirdləri arasında "Student Edition: Voleybol Turniri" təşkil olunub. Turnirin əsas məqsədi şagirdlər arasında fiziki aktivliyi artırmaq, komanda ruhunu gücləndirmək və onların asudə vaxtlarını səmərəli keçirmələrinə şərait yaratmaqdır. Layihə ərzində 8 komanda formalaşdırılıb. Yarışlar səkkizdə bir, yarımfinal və final mərhələlərindən ibarət olub.

Qeyd edək ki, layihə çərçivəsində məktəbdə voleybol klubu yaradılıb və 2 ay ərzində həftədə 2 dəfə olmaqla məşğələlər təşkil edilib.

Xatırladaq ki, "Student Edition: Voleybol Turniri" adlı layihə, Şirvan şəhər T. Bağırov adına 11 saylı tam orta məktəbdə Nurəddin Babayev tərəfindən həyata keçirilib. Layihənin məqsədi şagirdlərdə komanda işini, fiziki sağlamlığı və idmana marağı artırmaqdır. Bu layihə şagirdlərə voleybol vasitəsilə sosial və fiziki bacarıqlarını inkişaf etdirmək üçün yeni imkanlar yaradacaq və məktəblərarası idman əlaqələrinin genişlənməsinə töhfə verir.