Eksternat imtahanda iştirak üçün 6 minə yaxın şəxs qeydiyyatdan keçib

Eksternat imtahanda iştirak üçün 6 minə yaxın şəxs qeydiyyatdan keçib

Sabah keçiriləcək eksternat imtahanda iştirak üçün həm azərbaycan, həm rus bölməsi üzrə 5828 nəfər (və ya 6 minə yaxın şəxs) qeydiyyatdan keçib.

Bu barədə “Azərbaycan müəllimi”nin sorğusuna cavab olaraq Məktəbəqədər və Ümumi Təhsil üzrə Dövlət Agentliyindən bildirilib.

Məlumta görə, imtahan respublika üzrə Bakı şəhəri və digər bölgələri əhatə etməklə 15 imtahan mərkəzində həyata keçiriləcək.

Qeyd edək ki, sərbəst (eksternat) təhsilalma formasının tətbiqi müxtəlif səbəblərdən ümumi orta və ya tam orta təhsil səviyyəsini başa vura bilməmiş şəxslərə həmin səviyyələr üzrə buraxılış imtahanı verib müvafiq təhsil sənədi almaq üçün şərait yaratmaq məqsədi daşıyır.

Belə ki, imtahanda namizədlərə tədris planına uyğun əsas fənlərdən test formasında 110 sual (rus dili bölməsi-120 sual) təqdim olunur.

İmtahandan müsbət nəticə əldə etmiş şəxslər daha sonra DİM tərəfindən həyata keçirilən buraxılış imtahanlarında iştirak edirlər. Həmin imtahanın yekun nəticəsinə uyğun olaraq onlara təhsil sənədləri, yəni ümumi orta və ya tam orta təhsil haqqında attestat verilir.